Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 31. Juli 2020

31. Juli 2020

Plattdüütsch Narichten vun'n 31. Juli 2020 [4:04 Minuten]

Corona-Laag: Neje Infektschonen stiegen in Düütschland

Berlin. De düütschen Gesundheitsämter hebbt de höchsten Tahlen an Corona-Neeinfekschonen siet Weken mellt. Na de Behörden weern dat 902 neje Lüüd, de sick ansteken hebbt. Toletzt harrn de Ämter dat Robert-Koch-Institut twüschen 300 un 500 Infekschonen an´n Dag angeven. In de Stadtgemeend Bremen gift dat ölven neje Corona-Fallen, in Bremerhaben is kieneen dorto kamen. Dormit sünd in Ogenblick in dat Land Bremen 74 Minschen mit dat Virus infizieert. In Neddersassen gift dat siet güstern 70 neje Coronavirus-Fallen.

Amtsdoktors: Neje Coronawelle is vun´t Personaal man knapp hintokriegen

Berlin. Wegen de anstiegen Coronavirus-Infekschonstahlen slaan de Doktors vun de Behörden Alarm. För en tweete Welle vun de groten Süük, sünd de Gesundheitsämter „veel to knapp besett“, see de Vörsittersch vun´n Bunnsverband vun de Doktors in´n öffentlichen Gesundheitsdeenst, Teichert, to de Funke Mediengrupp. Nödig is en Utweg för en kotte Tiet. De Gesundheitsämter mööt in Notfall Hölp kriegen. Teichert sloog as Hölp vun de Gesundheitsämter en bunnswieten Freewilligen-List vör.

Lüüd, de ut´n Risikogegend trüch kaamt: Corona-Test an´n Flegerhaben Bremen

Bremen. An´n Flegerhaben vun de Stadt fangen vundaag de Corona-Tests för Lüüd an, de vun en Reis ut´n Risikogegend trüch kaamt. Mitarbeiters vun´t Gesundheitsamt weern in extra dorför inricht Teststellen den Wattepuschel in´n Mund, Hals un Nees vun de Lüüd steken, de wedder in´t Land rinkaamt. Noch sünd de Tests för de ankomen Fohrgasten freewillig – dat aver schall sick na dat Bunnsministerium för Gesundheit in´n Verloop vun de tokamen Week ännern. De Coronatest kost nix.

Bremer Grünnerpries utgeven: Junge Ünnernehmen uttekend

Bremen: De Bremer Sporkass hett den Bremer Grünnerpries an veer neje Firmen utgeven. Dat Priesgeld weer op 20.000 Euro verduppelt. Den ersten Pries kriegt en Ünnernehmen, dat sick mit dat minschliche Föhlen, Denken un Doon döör Maschinen utenanner sett. Mit düsse Technik will de Bedrief anner Ünnernehmen mehr Geld inbringen. Noch en Pries geiht an en Grünner, de Spezial-Software anbeed, mit de Ingenieurs Boodelen konstrueren könen. De Grünnerpries wurr in düsset Johr wegen dat Corona-Slamassel in en Video utgeven.

Bosteed in Bremen: Stratenbahn föhrt anners

Bremen. För de Stratenbahnlinie söss gift dat an düsset Wekenenn en anner Streckenföhrung un Behölpsbussen. Ursaak is en Bosteed vun de Bremer Stratenbahn AG in de Gegend Gustav-Detjen-Tunnel un Hermann-Böse-Straat. Bit Anfang September weern dor de Schienen nee makt. De Linie söss föhrt vun hüüt Avend (so üm Klock negen) bit Maandagmorgen (Klock dree) blots twüschen Flegerhaben un Hauptbahnhoff. Twüschen Bahnhoff , Universität un Swachhusen föhren Behölpsbussen.

Dat Weer

Un nu smiet wi noch een Blick op dat Weer: in Cuxhaben 19, an den Bremer Flegerhaben 22, an de Fischreehabenslüüs in Bremerhaben 20 un in Demorst sünd dat opstunns 22 Graad. Hüüt schient den ganzen Dag de Sünn. De Wind weiht en beten. Op de Eilands weiht dat in Maten vun de Süüdoosten-Kant. Dat Thermometer wiest en Temperatur vun 23 bit 27 Graad. Tokamen Nacht sünd de Sterns an´n Heven to sehn. Dat blift dröög bi 14 bit 17 Graad. Morrn schient eerst de Sünn, den könen gewaltige opstiegen Wulken opdükern. Hier un door kann dat pladdern un Blitz un Donnerslag geven. Dat Thermometer wiest en Temperatur vun 25 bit 30 Graad. Sünndag schient de Sünn, dat gift Wulken. Regen un Gewidder sünd bi 20 bit 23 Graad ok möglich.

Dat weern de Nahrichten op platt. Peter Behrendt hett se tohoopstellt. Op Platt trechtmaakt un vörleest hett se Markus Weise.

Plattdeutsche Nachrichten
Service