Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 30. Juni 2020

30. Juni 2020

Plattdüütsch Narichten vun'n 30. Juni 2020 [3:58 Minuten]

China: Nu gellt woll dat Hongkong-Gesetz

Peking: As dat lett, hett dat chineesche Parlament dat „Gesetz för den Schutz vun de natschonale Sekerheit in Hongkong“ in Kraft sett. Dat vermellt Medien in Hongkong. Dat Gesetz geiht vör allen gegen Akschonen, vun de China meent, se sünd gegen den Staat oder dat sik Lüüd vun China aflösen wüllt. China kann Schandarms un Geheemdeenstlers, de sik en Barg rutnehmen dröfft, na Hongkong bringen. Kritikers seggt: Dat dat Sonderverwaltungs-Land Honkong egenstännig is, dat kunn koppheister gahn.

Weg rut ut de Kahlen is free

Berlin: De Grote Koalitschoon hett den Weg freemaakt för Rut ut de Kahlen. Lang hebbt se verhannelt, man nu hebbt Union un SPD de letzten Knackpunkten oplööst. Geven schall dat Milliarden för Stütt-Programmen, so för den Umboo vun Kraftwarken. Kamen schüllt ok Extra-Regeln för Bedrievers vun ne‘ere Steenkahlen-Anlagen. Freedag köönt nu de Bunnsdag un de Bunnsraat de Gesetzen för dat Rut ut de Kahlen annehmen. 2038 wüllt se dormit dör ween.

Merkel un Macron wüllt EU-Corona-Hölps-Putt

Mesebarg: Wo Düütschland morgen den Posten vun den EU-Raatspräsident övernimmt, hebbt sik Bunnskanzlersch Merkel un de franzöösche Präsident Macron för en Corona-Hölps-Putt insett, för den de EU Schullengeld opnimmt. Beide sään: Mit den Plaan kunnen all in de EU mit Knööv ut de Corona-Tiet rutkamen. Bi dat Geld kunn een düt oder dat anners maken, an’t Enn müssen se aver de Länner Stütt geven, de böös ünner Corona lieden doot, sä Merkel, as se sik mit Macron op Slott Mesebarg drapen harr. Enige EU-Staaten sünd gegen den 750-Milliarden-Hölps-Putt. Denn dat weer eerste Mal överhaupt, dat de EU tohoop Schulden maakt.

Will Bremen bi de Jacobs University instiegen?

Bremen: Seggt warrt: Dat Land kann sik vörstellen, bi de Jacobs University intostiegen. In den Werser-Kurier steiht to lesen: In dat Wetenschafts-Ressort denkt se doröver na. Wat dor achter stickt: De private Hoochschool kunn dat Geld utgahn. De Bremer Senat snackt vundaag över de Saak. De gröttsten Andele hett de Jacobs Foundation, un de harr anseggt, se wüllt in Bremen utstiegen.

De Seute Deern naboen – dat warrt woll nix

Bremerhaven: Dat süht nich goot dorför ut, dat de Seute Deern naboot warrt. Uwe Beckemeyer, de dor de Lien in sien Hand hett, seggt: Dat Verhanneln mit den Bund is nich licht to. Kunn ween un se haalt en ganz anner Seilschipp na Bremerhaven. Alleen för dat Afwracken vun de Seute Deern rekent se nu mit dree Millionen Euro. Eerst harrn se ene Million ansett.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Kneten un Rotenborg överall 15 Graad. Vundaag: Wulken över Wulken, un de Sünn hett meist gor keen Schangs. An de Küst kann dat eerst ok en beten pladdern, later kann ok in Bremen de een oder anner Schuer daalkamen. Dat Thermometer krabbelt op 18 bet 20 Graad. De Wind dorto weiht in Maten oder frisch, op de Inseln ok mit Macht vun de süüdwesten Kant un mit däägte Böen. Tokamen Nacht: Mal mehr, mal weniger Wulken, regen kann dat ok en beten. Bi 15 bet 13 Graad. Morgen: Blots an de Küst kriegt wi de Sünn to sehn. Anners vele Wulken un en beten Regen kummt ok daal. An’n Namiddag un Avend treckt vun’t Emsland un Ossenbrügger Land däägte Schuer un Gewidder op. Dat Ganze bi 20 bet 22 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Peter Behrendt.

Plattdeutsche Nachrichten
Service