Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 22. Mai 2020

22. Mai 2020

Plattdüütsch Narichten vun'n 22. Mai 2020 [4:12 Minuten]

Corona-Tests: Spahn will ganz fix mehr

Berlin. Bundesgesundheitsminister Spahn will ganz fix mehr Corona-Tests in Gang setten. De CDU-Politer see de „Welt“, noch in den Maimaand wull he een Vörschrift vörleggen, de ut Vörsicht Tests in de Reeg in Krankenhüüs un Plegeheimen möglich makt. Wenn Patschienten or Inwohners opnahmen or ümtrecken, denn schallen Tests de Regel ween. Spahn meen, dat de Test-Möglichkeiten in de Chemieköken in´n Momang blots to Hälft utlast sünd.

Corona: Fachlüüd sehen Finanz-Maleschen bi veelen Hüerslüüd

Berlin. Wegen de Corona-Pandemie könen vele Börgerslüüd Maleschen bi dat Betahlen vun Geld för de Wahnung, Strom- un Heizkosten kriegen. De Fachlüüd-Rat för Verbrukerfragen vermellt in en Ünnersöken, dat de bet nu fastleggten Oplagen to´n Schutz vun Hüerslüüd nich langen könen. Af en Minus vun 400 Euro per Maand, weern Huusholten ohn Nootgroschens dorna sogor bannig överlast. Ok Eegner-Huusholten ohn Nootgroschens sünd na de Studie bedrapen: Bi se kamt dat to en Överlast af 450 Euro Verlüst in Maand.

Mehr Kuntrollen in Hongkong: Peking künningt nee Gesetzen an

Peking. In de chinesisch Hauptstadt hett de Sitten vun den Volkskongress anfungen. Dat Drapen findt wegen de Corona-Pandemie ünner scharpen Vörsichtsoplagen statt. In de tokamen Daag schall de Volkskongress en neet Gesett för Hongkong afnicken. Dormit will de chinesisch Regerung ehr Kuntrollen över dat Rebeet, dat ünner en besünner Verwaltung steiht, utwieden. Dat Vörhebben warrt womööglich den Protest gegen dat Mitsnacken vun Peking in Hongkong nee in Gang setten.

Corona Fallen in Fleeschbedrief: 54 Infekschoonen in Dissen

Dissen. In en Fleeschbedrief in de Stadt in Neddersassen sünd wedder en ganzen Reeg Corona-Infekschoonen naweest wurren. Bi de tweete Testreeg hebbt de Behörden bi 54 Mitarbeiders ut Oosteuropa dat Coronavirus funnen. Dat vermellt de Landkreis Ossenbrügge. Achtundartig vun se weern al in Quarantään. 16 Lüüd mööt nu ok in düsse Vörsorg. Testen wurren all tosamen 126 Mitarbeiders, de in den ersten Döörloop negative Resultaten harrn. Dormit stieg de Tahl vun de Kranken in den Bedrief op 146.

Vadderdag: Ruhige Fierdag in Bremen un Neddersassen

Bremen: De Schandarms in Bremen, Bremerhaben un Neddersassen vermellen, dat güstern an den Fierdag ünnern Streek allens good lopen is. Dorna weern woll vele Minschen ünnerwegens, de Regel-Vergahns sünd aver nich vun Belang. De mehrsten harrn sick an de Corona-Schutzregeln holen un hebbt en bannig godet Benehmen an´n Dag leggt. Vun de goden olen Bollerwagen-Turen in groden Koppels harrn de Fiernden in düsset Jahr afsehn. Ok de Krögers un Weertslüüd harrn de Hygienevörschriften un Afstandsregeln wiedgahns inholen. Dat vermellt de Polizei.

Dat Weer

Un nu een Blick op dat Weer: op Spiekeroog 16, an den Bremer Flegerhaben 17, an de Fischreehabenslüüs in Bremerhaben 19 un in Demorst sünd dat opstunns 18 Graad. Hüüt trecken an´n Vörmiddag ut Westen dichte Wulkenfeller op. An´n Middag gift dat Regen. An´n Namiddag un Avend kann dat ok düchtig pladdern. Hier un dor sünd ok Gewidder möglich. De Wind weiht en beten bit in Maten ut Süüdoost bit Süüd. Bi den Regen kann dat ok an un an störmsche Böen geven. Dat Thermometer wiest en Temperatur vun 19 bit 22 Graad. Tokamen Nacht trecken Schuer un Gewidder af un dat blift dröög bi 10 bit 12 Graad. Morrn gift dat en Wessel ut dichten Wulken, Sünnnschien un Regen. An´n Namiddag warrt dat fründlich bi 15 bit 19 Graad. Sünndag süht dat so ut as Sünnavend bi 14 bit 16 Graad.

Dat weern de Nahrichten op platt. Peter Behrendt hett se tohoopstellt. Op Platt trechtmaakt un vörleest hett se Markus Weise.

Plattdeutsche Nachrichten
Service