Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 21. Februar 2020

21. Februar 2020

Plattdüütsch Narichten vun'n 21. Februar 2020 [4:51 Minuten]

Unionsfraktionsviez verlangt mehr rechte för Verfatensschutz

Hanau. Döör den Anslaag, de as´t schient en rassistischen Achtergrund hett, hett de tweete Unionsfrakschoonsbaas Frei mehr Rechte för den Bundesverfatensschutz verlangt. In Hanau weern an´n Middewekenavend negen Minschen mit  butenlandschen Achtergrund in en Shisha-Bar un en Kiosk mit en Café dootscheten wurrn. De Keerl, de dat woll doon hebben schall un sien Mudder, hebbt de Schandarm dorna doot in en Wohnung funnen. An´n Avend geev dat in velen düütschen Steden Mahnwachen, an den all tosamen mehr as Dusend Minschen mitmakt hebbt. Ok in Bremen sünd se gegen Rechtsextremismus un Antisemitismus op de Straat gahn.

Berlinale-Beginn vun Anslaag in Hanau grumsig makt

Berlin. Mit de düstern Siet vun´n Anslaag in Hanau hett an´n Avend de Berlinale anfungen. Bi de Anfangs-Gala hebbt de Gäst mit de twee Böversten vun dat Festival, Rissenbeek un Chatrian, en Gedenkminut för de Doden afhollen. Ok Kulturstaatsministersch Monika Grütters un Berlins regeerender Börgermeister Müller hebbt düütliche Wöör bi de Gala gegen Rechtsextremismus funnen. As Inwiehensfilm wurr de kanadisch-irisch Produktschoon „My Salinger Year“ wiest.

Ümhauen vun Bööms för Tesla-Werk in Brandenburg draff wiedergahn

Berlin. Dat Ümhauen vun de Bööms för dat Tesla-Werk in Brandburg dörven wiedergahn. Lüüd, de sick för de Umwelt insett, hebbt dor erstmal en P vörsett, so dat se eerstmal nich wieder arbeiden kunnen. Dat se wiederarbeiden dröfft, hett dat Oberverwaltungsgericht Berlin-Brandenburg an´n Avend fastleggt. De Grünn för ehr Entscheden sünd, dat de Behörden al „ja“ to de vörtrocken Arbeiden seggt hebbt. De dringliche Andragen vun de Lüüd, de sick för de Umwelt insett, wurrn trüchwiesen. De US-Elektrofirma Tesla will de Produkschoon in Grönheid bi Berlin in Juli 2021 opnehmen.

Extra-Top-Drapen to´n EU-Huusholt geiht an´n Vörmiddag wieder

Brüssel. Bi dat EU-Extra-Top-Drapen för den tokamen Söven-Johr-Huusholt hett sick kien gaue Entscheden aftekend. EU-Ratspräsident Michel harr över Nacht enkelte Drapen mit den sövenuntwintig Staats- un Regerungsbaas föhrt. In en grode Runn kaamt man in Ogneblick in Brüssel wedder tosamen. Mit den in de verleden Week vörstellten Vörslaag vun Michel för´t Geld vör de Johren 2021 bis 2027 weern vele Mackers ut de EU nich inverstahn. He will Geld bi de Milliardenhölp för Europas Buurn un Gegenden insporen, aver mehr Geld för Klimapolitik, Grenzschutz, Forscher un Studerende.

Irlands Regerungsbaas vermellt na Wahl-Daalslag, dat he sien Hoot nimmt

Dublin. Knapp twee Weeken na de Parlamentswahlen in Irland hett Regerungsbaas Varadkar seggt, dat he dat Stüer ut de Hand gifft. Sien konservative Partei „Fine Gael“ harr bi de Wahlen blots fiefundartig vun de eenhunnertsösstig Stöhls in´t Ünnerhuus kregen. De ok konservative Partei „Fianna Fail“ hett achtundartig Posten kregen un is gröttste Kraft in´t Parlament. De Partei, de linksutricht is, „Sinn Fein“ hool mit veeruntwintig Komma fief Perzent de mehrsten Stimmen. Wegen dat ümständliche Wahlsystem is se aver in´t Ünnerhuus mit sövendartig Posten blots de tweetstärkste Kraft. Irland steiht en vigeliensche Regerungsbildung bevör. De Sinn-Fein-Vörsittersch McDonald will Ministerpräsidentin weern. Fine Gael un Fianna Fail hebbt en Tosamenarbeid mit Sinn Fein aver utsluten. De Partei weer de politische Telgen vun de Ünnergrundorganisatschoon IRA.

Dat Weer

Un nu een Blick op dat Weer: in Cuxhaben 7, an den Bremer Flegerhaben un an de Fischreehabenslüüs in Bremerhaben 6 un in Demorst sünd dat opstunns ok 6 Graad.
Hüüt Morgen un an fröhen Vörmiddag sünd enkelete Regenschuer möglich. De trecken na Oosten un af un an kiekt se Sünn döör de Wulken. Vun de Nordsee trecken an Namiddag noch mehr Wulken op. An´n Avend könen an de Küst Druppen fallen. Dat Thermometer wiest en Temperatur vun negen bis thein Graad. De Wind weiht in Maten bit frisch. An de Küst starke Süüdwestwind.  
Tokamen Nacht pladdert dat af un an bi velen Wulken. In´n Verlop treckt de Regen af un in´n Süden vun Bremen rieten de Wulken op. Dat Thermometer wiest en Temeperatur vun söven bit acht Graad.
Morrn sünd ok wedder dichte Wulken an Heven. Af un an kann dat pladdern bi üm un bi thein Graad.

Dat weern de Nahrichten op platt. Marcus Behrens hett se tohoopstellt. Op Platt trechtmaakt un vörleest hett se Markus Weise.

Plattdeutsche Nachrichten
Service