Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 14. Februar 2020

14. Februar 2020

Plattdüütsch Narichten vun'n 14. Februar 2020 [4:07 Minuten]

Dörsöken gegen rechte Terrorkoppel

Berlin. In en poor Bundeslänner hett dat vunmorgen fröh en Insatz gegen en Koppel, de se för Rechtsextremisten hollt, geven. As use Presse-Mann vermellt, hebbt Beamte ünner annern Wohnungen in Neddersassen döörsökt. Na dat Weten, vun de Beamten, de dat ünnersökt, schall de Koppel vun de möglichen Rechtsextremisten siet September vun´t verleden Johr betstahn. De darthein Mannslüüd schallen sick in Chats Fotos vun sülfst boeten Waffen hin un her schickt hebben un wüllt in Düütschland Tostänn as bi en Börgerkrieg maken.

Sekerheitskonferenz fangt mit Grundsatz-Reed vun Steinmeier an

München. Mit sworen Sekerheits-Anstalten fangt vundaag de Sekerheitskonferenz för dree Dag an. Dat Drapen gellt as dat wichtigste Tosamenkamen för Debatten över de weltwiede Sekerheitspolitik. Se reken mit mehr as dartig Staats- un Regerungsbasen so as binah negentig Butenminister un Minister för't Verdeffenderen. Bundespräsident Steinmeier wart dat Drapen an´n Middag so richtig op´n Weg bringen. An´n Rand vun de Konferenz wart dat wedder verscheden Akschoonen geven, bi de de Lüüd op de Straat gaht.

CDU-Vörsitt: Möögliche Kandidaten holt sick torüch

Berlin. De möglichen Kanidaten för den CDU-Vörsitt seggt wiederhen kien kloren Wöör to ehrn Afsichten. Ex-Unionsfraktschoonsbaas Merz verklort güstern Avend, dat he sick vörstellen kann Verantwoorden to övernehmen. Op de düütliche Fraag, of he sick as CDU-Parteibaas opstellen lett, anternt Merz blots, dat he wat för de Neeopstellung vun de CDU bidregen will. As mögliche wiedere Bewarver gellen de Ministerpräsident Laschet ut Nordrhein-Westfalen un Bundesminister för Gesundheit Spahn. Ok se hollen Mund un Dören dicht, wenn man se fragt, of se sick opstellen laten.

Mehr as 20 Grad in de Antarktis

Hobart. In de Antarktis hebbt se schienbor to´n eersten Mal Temperaturen vun över 20 Grad Celsius faststellt. Na Angaven vun en brasilianischen Wetenschaftler hebbt se op dat Seymour-Eiland 20,75 Grad meten. De hööchste Temperatur leeg bet nu bi 19,8. Dat Seymour-Eiland liggt vör de antarktische Halvinsel. In´n Snitt liggt de Temeperatur dor ok in´n Sommer normalerwies nich över null Graad.

Altmaier snackt op Bremer Schaffermahl

Bremen. Bundeswirtschaftsminister Altmaier is an´n Namiddag Ehrengast op de gode ole Schaffermahltied. De Fier findt to´n 476. mal statt. Jümmer hunnert Kaptains, Kooplüüd un Gäst kamen in´t Bremer Rathuus tosamen un spenden dorbi ok för Seelüüd, ehr Verwandten un Nautik-Studenten. Organiseert wart dat Mahl na ole Traditschoon vun dree mannshaftigen Schaffern – as in düsse Week rutkeem, wart af 2022 aver to´n ersten mal ok en Fro de Schaffermahltied mit utrichten.

Dat Weer

Un nu een Blick op dat Weer: in Nordholt 3, an den Bremer Flegerhaben 6, un an de Fischreehabenslüüs in Bremerhaben 4 un in Demhorst sünd dat opstunns 6 Graad. Vundag stellt sick en fründlichen Wessel ut lockeren un dichten Wulken un Sünnschien in. An´n Anfang könen noch en poor Drüppen fallen. Af Middag blift dat dröög. Dat Thermometer wiest en Temperatur von söven bit negen Graad. Tokamen Nacht sind en poor locker Wulken an Heven. Toeerst is dat dröög. Denn trecken vun de Nordsee dichte Wulken mit Regen bi fief bit söss Graad op. Morrn sünd mehrsttiets dichte Wulken an Heven. Richtung Ossenbrügger Land un Middelweser lockert dat op. Dat blift dröög. An de Küst pladdert dat aver bi ölven bis darthein Graad. Sünndag pladdert dat bi darthein bit sössthein Graad.

Dat weern de Nahrichten op platt. Ulrike Müller hett se tohoopstellt. Op Platt trechtmaakt un vörleest hett se Markus Weise.

Plattdeutsche Nachrichten
Service