Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 14. Januar 2020

14. Januar 2020

Plattdüütsch Narichten vun'n 14. Januar 2020 [4:00 Minuten]

Handy bringt Arger för von der Leyen

Berlin: In de Berader-Saak bi de Bunnswehr kriggt de fröhere Verteidigungsministerin von der Leyen mehr un mehr Wind vun vörn. In en neen Bericht steiht to lesen: Kunn ween un Daten op twee Handys vun de Ministerin sünd mit Bedacht löscht worrn. De Bericht seggt nich, wat von der Leyen de Daten sülvst löscht hett, man dat kunn goot angahn. Op de beiden Handys sünd Kottnarichten wegmaakt worrn. Dunnersdag snackt de Ünnersökens-Utschuss vun den Verteidigungs-Utschuss noch mal wedder över de sms vun de Ministerin un den Bericht vun dat Verteidigungsministerium över dat, wat se bet nu weet.

Bund un Düütsche Bahn: Programm för de Tokunft

Berlin: De Düütsche Bahn schall sik mit en Milliarden-Programm för de Tokunft opstellen. Bunnsverkehrsminister Scheuer un Bahnbaas Lutz ünnerschrievt an’n Middag en neen Leistungs- un Geldverdrag för den Konzern. In de tokamen teihn Johr wüllt se 86 Milliarden Euro vör allen för Gleisen utgeven. De Konzern seggt: Dat is de gröttste Plaan för Iesenbahngleisen in Düütschland överhaupt. De Düütsche Bahn speelt en wichtigen Part in dat Klimaprogramm vun de Bunnsregerung.

Kramp-Karrenbauer verlangt mehr Schutz för Kommunalpolitikers

Berlin: CDU-Baas Kramp-Karrenbauer hett verlangt: De Staat müss Kommunalpolitikers beter schützen. Wenn Politikers in de Gemeenden in Gefohr sünd, mutt sik de Staat beter vör jüm stellen, sä Kramp-Karrenbauer. Dat sik so’n Politikers en Gewehr anschafft, dat weer aver nich de richtige Weg. Wat dor achter stickt: De Börgermeister vun Kamp-Lintfort, Landscheidt, harr en Andrag op en Waffenschien stellt. Lüüd vun de rechte Kant harrn em de Fuust wiest.

Ozeane kloor warmer

Peking: De Ozeane weren verleden Johr so warm as noch nie – jedenfalls so lang as se dat opschrieven doot. Dat steiht in en Bericht vun Wetenschaftlers ut 11 Institute in ünnerscheedliche Länner. Dor steiht ok: De Klimawannel, de de Ozeane warmer maakt, bringt Warvelstörm vör Dag un asig Weer. De Forschers meent: Söcht warrt klökere Oorten, Energie to bruken.

Amazon in Achim: Schangsen för Arbeitsmarkt in Bremen

Bremen: För de Agentur för Arbeit Bremen-Bremerhaven is dat en grote Schangs för den Bremer Arbeitsmarkt, wenn Amazon na Achim geiht. Dat süht goot ut, dat op 2000 ne’e Arbeitssteden vör allen Lüüd en Schangs kriegt, de keen Lehrutbildung hebbt. Dat sä de Baas vun de Agentur, Ossmann, bi buten un binnen. So‘n Arbeitssteden för Hölpslüüd söökt se in Bremen veel, wo hier so veel Lüüd keen Arbeit hebbt, meen ok de Arbeitsnehmerkamer Bremen. Twee vun dree Lüüd, de hier keen Arbeit hebbt, hebbt ok keen Gesellenbreef. Amazon will den neen Standoort tokamen Johr in Bedriev nehmen.

Dat Weer

Un woans süht dat mit dat Weer umto ut? Opstunns hebbt wi op Baltrum 8 Graad, in Bremerhaven un Rotenborg sünd dat 9 Graad un in Bremen 10. Vundaag: Wulken över Wulken, un de smiet jümmers wedder Regen op uns daal. Dröög – dat is de Utnahm. Heller warrt dat blots mal na de Küst to. Dat Thermometer krabbelt op warme 9 bet 11 Graad. De Wind dorto weiht flau oder en beten mehr vun de süüdwesten Kant, an de Küst ok frisch un mit starke Böen. Tokamen Nacht: Dichte Wulken, un pladdern deit dat ok. Later kann dat ok mal oplockern. Dat blifft warm bi 10 bet 8 Graad. Morgen: Süüdööstlich vun Bremen mal mehr, mal weniger Wulken, wi kriegt ok de Sünn to sehn, un dat blifft dröög. Mehr na de See to staht ok mehr Wulken. Un dor kann dat ok pladdern. Dat Ganze bi warme 11 bet 13 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katrin Martens.

Plattdeutsche Nachrichten
Service