Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 2. Dezember 2019

2. Dezember 2019

Plattdüütsch Narichten vun'n 02. Dezember 2019 [3:10 Minuten]

Klimagipfel fangt an

Madrid: In de spaanschen Hauptstadt fangt in düssen Minuten de 25. UN-Klimakonferenz an. Vertreder ut mehr as 190 Staaten sünd dorbi. Bet to’n 13. Dezember wüllt se daröver snacken, wo dat Pariser Klimaafkamen vun 2015 wieter ümsett warrn kann. Dorbi wüllt se dat schaffen, dat dat in’n Vergliek to dat vörindustrielle Tietöller blots noch düütlich ünner twee Graad op de Eer warmer ward.   

Tokamen SPD-Baas will Koalitschoonsverdrag naverhanneln

Berlin: De tokamen SPD-Böversten seggt opstünns noch nix över de Tokunft vun de Groden Koalitschoon. Eerstmol wüllt se den Koalitschoonsverdrag naverhanneln. Walter-Borjans, de Vörsitter warrn schall, hett in de ARD mehr Investitschonen, den Afscheed vun de so nöömten swatten Null un mehr Insatz för den Klimaschutz fordert. To’n Nabetern is de Union betto aver noch nich praat.

Trump kummt nich to Anhören

Washington: US-Präsident Trump un sien Afkaten warrn nich an en Anhören in dat Representantenhuus deelnehmen, wo dat üm dat Verfahren geiht, dat em mööglicherwies ut dat Amt böhren schall. Dat hett en Vertreder vun dat Witte Huus vermellt. De Ünnersöken is den Präsidenten gegenöver nich gerecht un verfahrensrechtlich nich in Ordnung, ward as Grünnen angeven. De Vörsitter vun‘n Justizutschuss, Nadler, hett Trump un sien Afkaten kloor un düütlich to de Sitten an’n tokamen Middeweken inladen.     

Al wedder Dode bi’t Unweer in Süüdfrankriek

Marseille: In‘n Insatz gegen dat swore Unweer in Süüdfrankriek is en Rettungshelikopter afstört. Dorbi sünd in de Neegde vun Marseille dree Hölpslüüd to Dode kamen. In de Gegend geev dat an’t Weekenenn wedder swore Unweer mit veel Regen. Tominnst twee Minschen sünd dorbi in de Floot versapen.   

Werder Bremen hett mol wedder wunnen

Wolseborch: Werder Bremen hett na acht Spelen achter’nanner ahn Sieg mol wedder in de Football-Bunnsliga wunnen. De Gröön-Witten hebbt en 3:2 in Wolseborch schafft. Werder hett nu 14 Punkte un sett sik dormit’n beten vun de letzten in de Liga af.        

Dat Weer

Un nu en Blick op dat Weer: in Ossenbrügge 1, an’n Bremer Flegerhaben 3, in Bremerhaben 5, un op Langeoog un Spiekeroog sünd dat opstünns 8 Graad. Hüüt trecken veele Wulkenfeller dör. Blangenbi schient af un an de Sünn. Vun de Noordsee her mööt wi middags jümmer wedder mit Regenschuer un Grisselgrussel reken. Darna blifft dat wedder fakener dröög bi 6 bet 8 Graad. In de Nacht is dat mol mehr, mol weniger wulkig. Enkelte Schuer sünd wieterhen mööglich. De mehrste Tiet blifft dat aver dröög bi 6 bet 1 Graad. Morgen gifft dat faken dichte Wulken, blots wenig Sünn, un besünners an de Küst köönt’n poor Druppen fallen. Meisttiets is dat aver dröög bi 7 bet 9 Graad.

Dat weern de Narichten op platt. Tohoopstellt hett se Claudine Bimmermann. Op Platt trechtmaakt un vörleest vun Marc Gelhart.

Plattdeutsche Nachrichten
Service