Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 8. November 2019

8. November 2019

Plattdüütsch Narichten vun'n 8. November 2019 [3:24 Minuten]

Gröttere Hölp för Terror- un Gewaltopfers

Berlin. De Bundesregerung will Opfers vun Terrorangrepen un de Verwandten vun düsse Minschen beter versorgen. Dat hett de Bundesdag besluten. Mit dat neje Gesett kriegen de Opfers, de Gewalt an´t Lief spören mussen, jeden Maand mehr Geld. Ok de Waisenrent un Beerdigungsgeller schallen anstiegen. Opfers vun Gewalt an Kopp un Seel schallen ok wat kriegen, um dat wedder goot to maken. Jüst so as de Minschen, de as Tügen vun Terror ünner en sworen Schock lieden. Nu muss de Bundesrat noch tostimmen. De mehrsten neen Gesetten gellen erst Anfang 2024.

Boord-Personal Streik bi Lufthansa geiht wieder

Frankfurt. Bi de Lufthansa geiht de Streik vun dat Boord-Personal wieder. Dormit wullen de Lüüd, de in de Kabinen arbeidt dat schaffen, dat de Flegergesellschaft mehr Geld betahlt. Na den Sonderfloogplan vun de Lufthansa schallen hüüt weltwiet binah 600 Flöög utfallen. Ok in Bremen, Hamborg, Hannover und Mönster/ Ossenbrügge sünd vele Flöög vun un na München un Frankfurt afseggt. De Lufthansa rekend dormit, dat 180.000 Fohrgäst döör den 48 Stünnen Streik dor wat mit to doon hebbt.

Mehr Geld för Bremer Polizei

Bremen. De Polizei schall in düsset Johr 170.000 Euro bavento kriegen. Dormit will se den Beamten en Deel vun ehr Överstünnen utbetahlen. Dat hett de Binnendeputatschion besluten. De ganze Bavento-Arbeit vun de Schandarms is dormit noch lang nich betahlt. All tosamen schuven de Beamten 380.000 Överstünnen vör sick her. Anfang tokamen Johr will de Binnenbehöörd noch mehr Överstunnen utbetahlen.

Leege Wunnen an´t Lief

Bremen. En Mann, de böös wat afkregen hett, is verleden Nacht in een Kroog in Steintor gahn un dor tosamensackt. He weer vull vun Bloot an´t Lief un wurr stantepee in een Krankenhuus bröcht. Of dat bi em um Leven un Doot geiht, weer noch nich kloor. De Polizei versökt nu ruttofinnen, wo de Mann herkeem un wat em passert weer, ehrdat he in den Kroog keem.

Füer op dat Mülllager

Bremen. Güstern Avend hett dat een poor Minuten na Klock thein op dat Mülllager in Blockland een Füer geven. De Grund kennt se nich. Dartig Füerwehrlüüd weern dormit togang, dat Füer uttokriegen. Erst na veer Stünnen weer dat Füer ut. Den Müll, de in Flammen weer, mussen se utenanner trecken um all Füernesten ganz un gor ut tomaken.

Dat Weer

Un nu een Blick op dat Weer: in Veern 5, an de Fischreehabenslüüs in Bremerhaben 6 un in Demorst sünd dat opstunns 4 Graad. Hüüt gift dat en fründlichen un dröögen Wessel ut Sünnschien un Wulkenfeller. Dat Thermometer kladdert op acht bit thein Graad. De Wind weiht en beten. An de Küst ok to´n Deel in maten ut Süd bet Südoost. Tokamen Nacht trecken vun südoosten dichte Wulkenfeller an. In dat Landstück um de Wümm un in de Veern Heid kann dat ok pladdern. Dat Thermometer sackt op fief bit twee Graad. Morgen gift dat vele Wulken. In´n Oosten vun de Weser kann dat ok n´poor Drüppen geven. Dat Thermometer wiest een Temeperatur vun acht bit negen Graad.

Dat weern de Nahrichten op platt. Carola Schwirblat hett se tohoopstellt. Op Platt trechtmaakt un vörleest hett se Markus Weise.

Plattdeutsche Nachrichten
Service