Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 10.Oktober 2019

10. Oktober 2019

Plattdüütsch Narichten vun'n 10. Oktober 2019 [3:28 Minuten]

Polizei in Halle söökt wieder dorna, worüm he dat doon hett

Halle. Na de Schöten in Sassen-Anhalt gift dat jümmer mehr Henwiese, dat dor wat rechtsextremes achter stickt. Medienberichte vermellen, dat dor een Verkloren över thein Sieten opdükert is. De schallen vun den sien, de dat wohrschienlich daan hett. Den Kerl hebbt se güstern fastnamen. In dat Popeer schall he mit sien Wöör ankünnigt hebben, „so vele Nich-Witte as möglich um de Eck to bringen“. De Verbreker hett twee Minschen dootschoten. Twee Lüüd hebbt böös wat afkregen. Toerst hett he versökt in een Synagoge rintokamen. Dat hett aver nich klappt. De Synagoge weer good vull mit Minschen.

Zentralrat vun de Juden bekrittelt Polizei

Berlin. De Vörsitter vun den Zentralrat vun de Juden in Dütschland, Schuster, is de Polizei in Halle scharp angahn. Dat weer een Schandaal, dat dat an den Jom Kippur Fierdag keen Polizeischutz an de Synagoge geven hett, so Schuster. In Bremen sünd na den Anslag vun Halle güstern Avend binah 100 Minschen gegen Antisemitismus op de Straat gahn.

Törkei marschert in Nordsyrien in

Ankara. De törksche Armee is nu ok mit Truppen an´n Grund in Nordsyrien inmarschert. An de Grenz schallen se un kurdische Truppen swor opeenanner daal gahn ween. Toerst harr dat Angrepen ut de Luft op Steden vun de kurdische Miliz geven. Dorbi schallen 15 Minschen to Dode kamen ween, dat vermellen syrische Aktivisten. Een unafhängig Överpröfen vun de Angaven is vigeliensch.

Marine hett erstmal een Behölp för „Gorch Fock“ funnen

Bremerhaben. Marine-Kadetten schallen eerstmal op de „Alexander vun Humboldt II“ ehr Utbildung maken. Dat Seilschoolschipp ut Bremerhaben mit de grönen Seils, de veele kennen doot, warrt solang för de „Gorch Fock“ brukt. Se warrt in Ogenblick wedder trechtmakt. 200 Kadetten schallen op dat Schipp utbillt weern.

Düütschland speelt liekop gegen Argentienen

Dortmund. De düütsche Football-Natschonalmannschaft is, ok wenn se toerst föhrt hebbt, nich över een Unentscheden gegen Argentienien rutkamen. Dat Speel is mit twee to twee to Enn gahn. För Düütschland hebbt Gnabry un Havertz drapen.

Dat Weer

Un nu een Blick op dat Weer: in Braak 12, an den Bremer Flegerhaben; an de Fischreehabenslüüs in Bremerhaben un in Demhorst sünd dat opstunns 10 Graad.
Hüüt gift dat toeerst vele Wulken un blots en beten Sünn. Vun de Eilands bit to de Elvmündung pladdert dat af un an. An´n Namiddag schient de Sünn en beten länger, dorto kamen aver ok jümmer wedder deegte Regenschuer. Dat Thermometer kladdert op darthein bit foffthein Grad. De Wind weiht frisch bit stark vun südwest- bit west mit störmschen Böen.
Tokamen Nacht kamen vun de Nedderlannen un de Nordsee dichte Wulken un Regen. Achteran blieven de Wulken. Hier un dor kann dat pladdern. Dat Thermometer sackt op negen bit twölf Graad. Morgen kann dat toerst Nevel geven. Den ganzen Dag is dat gries un jümmer wedder kann dat pladdern. Mennigmal ok teemlich lang bi foffthein bit sössthein Grad.

Dat weern de Nahrichten op platt. Jan Siegert hett se tohoopstellt. Op Platt trechtmaakt un vörleest hett se Markus Weise.

Plattdeutsche Nachrichten
Service