Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 9. Oktober 2019

9. Oktober 2019

Plattdüütsch Narichten vun'n 9. Oktober 2019 [3:58 Minuten]

Dat Witte Huus speelt nich mit, wenn gegen Trump vörgahn warrt

Washington: Bi den Ukraine-Schandaal geiht US-Präsident Trump nu op Kollisionskurs. Dat Witte Huus speelt afluuts nich mit, wenn de Kongress Tügen anhören oder Unnerlagen ankieken will. De Avkaaf vun dat Witte Huus hett an de Kongresskamer schreven: Wat de Demokraten allens unnersöken doot, um den Präsident womööglich ut sien Amt to drängen, dat weer mit dat Recht un de Verfaten nich övereens. De Sprekersch vun dat Repräsentantenhuus, Pelosi, sä: Trump stünn nich över dat Gesetz.

Kabinett will Klimaschutzprogramm op den Weg bringen

Berlin: In’t Kabinett wüllt se hüüt Vörmiddag dat Klimaschutzprogramm besluten. Dor hett de Regerung rinschreven, wat Düütschland bet 2030 dorgegen doon will, dat dat op de Eer jümmers warmer warrt. Wat dat Klimakabinett verleden Maand grundsätzlich afsnackt harr, wüllt se nu för enkelte Rebeten nipp un nau fastleggen. Also: Op wat schall de Energiewirtschap daal, wat lööpt bi Hüüs oder bi de Buern? Bet 2050 will Düütschland keen Drievhuusgas mehr in de Luft puusten.

Utgliek för Bremer Lehrers

Bremen: De Bremsche Bildungsbehöörd mutt woll en Schaden utglieken bi tominnst 1.500 Schoolmesters. Dat hett dat Verwaltungsgericht Bremen fastleggt, un de Werser-Kurier hett dat to weten kregen. De Lehrers hebbt twüschen 2003 un 2015 mehr arbeiten musst, hebbt dor aver keen Geld för kregen. Bildungssenatersch Bogedan will dat Ordeel annehmen. Kösten warrt dat de Behöörd womööglich 7,5 Millionen Euro.

Mehr un mehr Düütsche fleegt

Düsseldörp: Ok wenn veel över dat Klima snackt warrt: Mehr un mehr Lüüd in Düütschland reist mit en Fleger. Siet August 2018 sünd Maand för Maand mehr Minschen mit en Fleger ünnerwegens ween as in densülvigen Maand in’t Johr vörher. So steiht dat in de „Rheinische Post“, un de hett de Tallen vun dat Statistsche Bunnsamt. In’n August 2018 harr de Klimaaktivistin Greta Thunberg ehr „Fridays For Future“ in Gang sett.

Mehr E-Rullers in Bremen

Bremen: En tweten Bedriev will in Bremen Elektro-Pett-Rullers anbeden. So weer dat ut dat Verkehrsressort to hören. De Firma will 500 vun so’n E-Rullers in de Binnenstadt opstellen. Opstunns kickt de Behöörd na, wat dat Unnernehmen ok all de Oplagen inhöllt. So dröfft de Rullers nich in Parks fohren oder afstellt warrn. Dat mutt en Software regeln. En anner Firma harr ok al en Andrag op 500 Rullers stellt. De Behöörd seggt nu: Womööglich köönt beide Bedrieven noch vör Wiehnachten in Bremen losleggen.

Dat Weer

Un woans süht dat mit dat Weer umto ut? Opstunns hebbt wi in Wittmund 11 Graad, in Bremen, Bremerhaven un Achim sünd dat 12 Graad. Vundaag: Eerst en poor Wulken, af un an Sünnschien. Dröög. Vun’t Emsland her treckt aver gau dichte Wulken ran, un de smiet vun’n Middag op an Regen op uns daal. Dat Thermometer krabbelt op 13 bet 14 Graad. De Wind dorto weiht in’t Binnenland in Maten, an de Küst frisch vun de süüdwesten Kant, ok mit starke bet störmsche Böen. Tokamen Nacht: Mal um Mal treckt Wulkenbargen dör, dat kann ok kort mal pladdern, an de See ok mehr. Twüschendör weniger Wulken un dröög. Bi 10 bet 7 Graad. Morgen: Mal Sünnschien, mal Wulken. An de See un na de Elv to kann dat aver ok pladdern. Gegen Middag regent dat in’t natte Dreeeck, laterhen lockert de Wulken aver noch mal wedder op. Dat Ganze bi 13 bet 14 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katrin Martens.

Plattdeutsche Nachrichten
Service