Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 14. Juni 2019

14. Juni 2019

Plattdüütsch Narichten vun'n 14. Juni 2019 [3:08 Minuten]

US-Militär wiest Video to Tanker-Attack

New York: De USA hebbt en Video ruutgeven, dat en iraansche Attack op Tankscheep wiest. Dorop is to sehn, wo iraansche Suldaten mit en Snellboot an een vun de Öltankers anleggt un mit Haftminen rümfohrwarkt. De Iraan hett dat, wat em vörsmeten ward, bi de Vereenten Natschonen stantepee trüchwiest.

Betto keen Eenigung bi Grundstüer

Berlin: Union un SPD hebbt sik betto jümmers noch nich in’n Striet üm de Grundstüer eenigt. Unions-Fraktschoons-Baas Brinkhaus un de Geschäftsföhrer vun de SPD-Fraktschoon Schneider hebbt in Interviews seggt, dat jümmers noch keen Enn in Sicht is. Na Informatschoon vun dat ARD-Hauptstadtstudio harrn sik de Vertreder vun de Koalitschoonsparteien dorop eenigt, dat de Bunnsländer in Tokunft vun de bunnswieten Regelung ofwieken dröfft.

Horenhuus in de Bremer Neestadt maakt bald apen

Bremen: In de Bremer Neestadt ward woll in’n August en Horenhuus opmaken, mit dat veele nich inverstahn sünd. Na Informatschonen vun „Buten un Binnen“ hett dat Wirtschaftsressort dat Huus güstern nipp ankeken un in’n Groden un Ganzen grönet Licht för dat Etablissemang geven. Rechtlich sehn gifft dat dor nix an uttosetten, seggt de Wirtschaftsbehöörd. Siet twee Johren al ward dorgegen protesteert. Lüüd, de dor wahnt un Froenrechts-Organisatschonen wüllt dat Projekt afwehren.      

Sworer Unfall an’n Bahnövergang

Hude: En Mann is an en Bahnövergang in’n Landkreis Ollnborg vun en Lok faatkregen un dorbi swor versehrt worrn. De 79-Johrige hett an’n Avend sien Fohrrad an de Halfpahlen vörbi över de Gleisen schaven. De Lokföhrer hett noch allens versöcht, üm de Lok rechttiedig antoholln.   

Dag vun de Neddersassen an de Jade

Wilhelmshaben: Vun hüüt an bet to’n Sünndag ward in de Stadt an’n Jadebusen de 36. Dag vun de Neddersassen utricht. To de Fier rekent se mit meist 300.000 Besöker. Wilhelmshaben is to’n eersten Mol Utrichter vun düsset Fest un fiert dorbi sien 150. Geboortsdag.

Dat Weer

Un nu en Blick op dat Weer: op de Inseln 19, an‘n Bremer Flegerhaben 21, un in Bremerhaben un Demorst sünd dat opstünns 22 Grad. Hüüt gifft dat en Wessel ut veel Sünnschien un en poor Wulken. In’n Westen sünd ok korte Schuer un Gewidder mööglich. Dat ward tonehmend bruttig bi 23 bet 29 Grad. In de Nacht trecken vun’n Westen her dichte Wulken op, de deegte Schuer un Gewidder bringen köönt. De Luft köhlt sik af op 15 bet 17 Grad. Mörgen ward dat meisttiets wulkig, af un an schient de Sünn. Dorbi sünd ok deegte Schuer oder Blitz un Donnerslag mit starken Regen mööglich. Vun’n Namiddag an lett de Gefohr vun Regen un Gewidder en beten na, so dat dat noch dröög un fründlich warrn kann. De Temperaturen sünd wedder bruttig bi 18 bet 23 Grad.

Dat weern de Narichten op platt. Tohoopstellt hett se Michael Nendza. Op Platt trechtmaakt un vörleest vun Marc Gelhart.

Plattdeutsche Nachrichten
Service