Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 12. Juni 2019

12. Juni 2019

Plattdüütsch Narichten vun'n 12. Juni 2019 [3:33 Minuten]

In Bremen verhannelt se över en Koalitschoon

Bremen: Siet en Halvstunnstiet verhannelt SPD, Gröne un Linke över en Koalitschoon. Goot twee Weken na de Börgerschapswahl wöllt se dat eerste Mal in en Bunnsland in Westdüütschland Root-Gröön-Root op de Been stellen. Vundaag wüllt de Parteien eerstmal en Fohrplaan opstellen un Facharbeitsgruppen insetten. Bet Enn Juni schall de Koalitschoonsverdrag trecht ween. De Liddmaten un Delegeerten vun de dree Parteien mööt em denn noch annehmen.

Mehr Geld för Wiederbildung

Berlin: De Bunnsregerung will woll mehr för Wiederbildung in Gang setten. De keen Utbildung afslaten hett, schall en Anrecht kriegen, den Afsluss natohalen. Ok will de Bunnsregerung mehr Geld dorför freegeven, dat sik Minschen wiederbillen köönt – dat se to’n Bispeel den Meister oder Fachwirt maakt. So steiht dat in en Poppier binnen, dat Bildungsministersch Karliczek un Arbeitsminister Heil hüüt Middag vörstellen wüllt. Wat dor achter stickt? – de digitale Wannel un de Arbeitswelt, de sik egaalweg ännern deit.

Striet um Utlever-Gesetz in Hongkong

Hongkong: In dat Parlament in Hongkong wüllt se nu doch eerstmal nich över dat Utlever-Gesetz snacken. Wo se gegen düssen Plaan sünd, hebbt teihndusende Minschen vunmorgen grote Straten un Hüüs vun de Regerung dicht maakt. Na dat Gesetz köönt Minschen ut de fröhere britsche Kolonie an Festland-China utlevert warrn. Vele meent nu, dat kunn Dissidenten drepen un Lüüd, de mit de kommunistische Partei över Krüüz sünd.

Dat Enn vun den Ramadan: Senatsempfang in Bremen

Bremen: In de bövere Raathuushall fiert an’n Namiddag Muslime un Maten vun den Senat dat Enn vun den Fastenmaant Ramadan. Dat is al en Traditschoon, dat de Bremer Senat Muslime inlaadt un mit jüm tohoop dat Zuckerfest fiert. En Schadden över dat Fest smitt en Saak, de Sünnavend passeert is. In en Moschee dicht bi den Bahnhoff weren Koran-Böker schännt worrn. Wokeen dat maakt hett, weet se noch nich.

DFB-Footballers schickt Estland 8:0 na Huus

Mainz: De düütsche Football-Natschonalmannschap hett güstern Avend in ehr Speel in de EM-Qualifikatschoon kloor de Bavenhand hatt. Estland hebbt se mit 8:0 afrüüscht. Marco Reuss un Serge Gnabry hebbt beid tweemal drapen. Un denn noch Leon Goretzka, Ilkay Gündogan, Timo Werner un Leroy Sané. De Düütschen hebbt in dree Spelen dreemal wunnen.

Dat Weer

Un woans süht dat mit dat Weer umto ut? Opstunns hebbt wi op Spiekeroog 16 Graad, in Zeven sünd dat 17 un in Bremen un Bremerhaven 18 Graad. Vundaag: Mal hell un kloor, man dorto kann dat eerst blots en beten, an’n Namiddag denn aver mehr pladdern, ok mal deegt un mit Blitz un Dunnerslag. Gegen Avend denn wedder wat ruhiger un de Wulken lööst sik op. Dat Thermometer krabbelt op 18 bet 23 Graad. De Wind dorto weiht flau oder en beten mehr, he dreiht vun de norden över de noordoosten bet hen na de süüdwesten Kant. Tokamen Nacht: Dröög, un wi kriegt ok de Steerns to sehn. Dat Ganze bi 13 bet 10 Graad. Morgen: Blots en poor Wulken, un meisttiets lacht uns de Sünn. Mag ween un an’n Avend kummt mal en Flaag daal. Bi 22 bet 25 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.

Plattdeutsche Nachrichten
Service