Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 15. Mai 2019

15. Mai 2019

Plattdüütsch Narichten vun'n 15. Mai 2019 [3:14 Minuten]

Grote Koalitschoon: Paket-Utdregers beter afsekern

Berlin: CDU un SPD hebbt güstern Avend in den Koalitschoons-Utschuss afsnackt: Grote Paketdeensten wüllt se mehr in de Plicht nehmen. De schüllt de Sozialafgaven för de Utdregers nabetahlen, wenn de Subünnernehmers dat nich doot. So will de grote Koalitschoon de Paket-Utdregers beter dorgegen afsekern, dat se utnutzt warrt.

Syrien: USA un Russland leggt Kurs fast

Sotchi: De USA hebbt künnig maakt: Se hebbt mit Russland en Kurs afstimmt, dat se in de Syrien-Fraag wedder politische Lösungen in’t Oog faten köönt. US-Butenminister Pompeo sä dat, as he mit den russschen Präsident Putin tohoopseten harr. Se wüllt en Komitee op de Been stellen, un dat schall för de Tiet na den Krieg för Syrien en Verfaten opsetten.

EU: Telefoneren in Europa warrt billiger

Brüssel: Knapp twee Johr lang gifft dat al keen Roaming-Geld mehr, nu warrt dat ok billiger, wenn een normaal na dat europääsche Butenland telefoneren will. Vun hüüt op an dröff de Minuut nich mehr as 19 Cent kösten. Ok de Pries för en SMS hett nu en böverst Mark, un dat liggt bi 6 Cent för jeedeen Naricht. So bringt de EU en Kostenmöhl ut de Welt. Bet nu weer Telefoneren na dat Butenland twee- bet dreemal so düer as in’t Binnenland.

Dat Moor brennt in’t Emsland

Papenborg: In’t Emsland brennt wedder dat Moor – op en Stück Land nöördlich vun Esterwegen, wo se Törf afboot. En Tietlang weer dat Füer so groot as de Hamborger Binnenalster. De Polizei seggt: De Füerwehr un dat Technische Hölpswark hebbt dat Füer nu in’n Griff. De Polizei hett de Bunnsstraat 401 afsparrt, dor müssen se dat Löschwater ut den Küstenkanal röverpumpen.

Ieshockey: Düütschland winnt gegen Frankriek

Kosice: Düütschland hett bi de Ieshockey-WM dat drüdde Speel wunnen. Güstern Avend harrn se gegen Frankriek mit 4:1 de Bavenhand. Un nu süht dat goot ut, dat se ünner de letzten Acht kaamt. Vundaag mööt de Düütschen gegen de Tohuus-Mannschap ut de Slowakei ran.

Dat Weer

Un woans süht dat mit dat Weer umto ut? Opstunns hebbt wi in Cuxhaven un Ossenbrügge 11 Graad, in Bremen un Bremerhaven sünd dat 12 Graad. Vundaag: Eerst lacht uns de Sünn. An’n Namiddag un Avend treckt vun de Wümm her Wulken op, man dat blifft dröög. Dat Thermometer krabbelt op 13 bet 17 Graad. De Wind dorto weiht flau vun de noorden bet noordoosten Kant. Tokamen Nacht: Dichte Wulken, un ut de kann dat ok en beten pladdern, vör allen twüschen Werser un Elv. Meist överall aver blifft dat dröög. Mit Nachtfrost mööt wi nich mehr reken. Wi kriegt twüschen 8 un 4 Graad. Morgen treckt dicke Wulkenplacken dör. An de Küst meisttiets dröög, vun de Veerner Heid bet na dat Ollenborger Mönsterland kann dat ok deegten Regen geven. Bi 13 bet 15 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Nendza.

Plattdeutsche Nachrichten
Service