Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 15. April 2019

15. April 2019

Plattdüütsch Narichten vun'n 15. April 2019 [3:16 Minuten]

Minnstlohn-Gesetz ward faken nich inhollen

Bremen: En Sonderkommischoon is in de verleden twee Johren in Bremen un Bremerhaben 13 Fälle wiesworrn, de nich mit dat Minnstlohn-Gesetz övereens weern. Bi öffentliche Opdrääg hebbt de Arbeiders besünners op Bosteden nich jümmers soveel kregen, as vörschreven weer. Dat steiht in en Bericht, den de Senaat mörgen op’n Disch hett. 6200 Opdrääg sünd vun Bremen un Bremerhaben in de verleden twee Johren vergeven worrn.     

Nee’e Kontrollsysteme för dat Jobcenter

Berlin: De Jobcenters warrn sik vun hüüt an nipp un nau ankieken, wat se richtig tellt hebbt. Mit automatiseerten Kontrollsystemen schüllt de Mitarbeiders Fälle finnen, wo de Daten vun Lüüd op Hartz IV falsch to ween schient. De Bunnsreknungshoff hett faststellt, dat dat villicht Fehler bi de Tall vun Lüüd ahn Arbeit gifft. Dat kann angahn, dat 290.000 Lüüd falsch anmellt worrn sünd. Dorüm sünd 115.000 Lüüd ahn Arbeit nich as sückse op de List.   

Sozialdemokraten winnen Parlamentswahl

Helsinki: De Sozialdemokraten hebbt in Finnland de Parlamentswahl wunnen. Se hebbt 17,7 Perzent vun de Stimmen afkregen. Op den tweten Platz is de rechtspopulistische Partei „De Finnen“ kamen, Platz dree hett de konservative Nationale Sammlungspartei kregen. So as dat utsüht, kriggt de sozialdemokraatsche Parteibaas Antti Rinne den Opdrag to‘n Billen vun de Regeern. He will ünner annern dorför sörgen, dat Rentners un anner Lüüd, de nich soveel in de Melk to krömen hebbt, mehr Geld kriggt.  

Acht Dode dör Storm in de USA

Washington: Dör en dägten Storm sünd in’n Süden vun de USA tominnst acht Minschen doodbleven, dorünner dree Kinner. In Texas sünd twee Lüüd in en Auto storven, wiel en Boom dorop daalfullen is. In Louisiana is en 13-Johriger in en Stormfloot versapen. Dör de Warvelstörm is in veele Gegenden de Stroom utfullen, un Hüüs un Straten sünd twei gahn. Nu treckt de Storm wieter na Oosten.

Schadensersatzklaag gegen graven Patschenten

Bremen: Dat Landgericht verhannelt an’n Namiddag de Schadenersatzklaag vun en Rettungssanitäter gegen en Patschenten. Vör twee Johren hett de Sanitäter den Anklaagten bi en Insatz in Bremerhaben tosamen mit en Kollegen versörgt. Op’n Weg in’t Krankenhuus güng de Mann op den Sanitäter los un hett em ünner annern mehrere Rippen braken. Siet de Tiet kann he nich mehr arbeiden un verklaagt den Mann nu op Bröök un Geld för den Schaden.             

Dat Weer

Un nu en Blick op dat Weer: op Wangerooge un an‘n Bremer Flegerhaben 6, in Bremerhaben 7, un in Staad un Rhauderfehn sünd dat opstünns 8 Grad. Hüüt gifft dat veel Sünnschien un en poor Wulken, de sik ahn Regen wedder oplösen. De Temperaturen liggen twüschen 12 un 15 Grad. In de Nacht funkeln de Steerns an’n Heven un dat blifft heel un deel dröög. Hier un dor is Boddenfrost mööglich bi 1 bet 3 Grad. Ok mörgen schient den heelen Dag de Sünn un dat blifft dröög bi 12 bet 16 Grad. Dat weern de Narichten op platt. Tohoopstellt hett se Carola Schwirblat. Op Platt trechtmaakt un vörleest vun Marc Gelhart.

Plattdeutsche Nachrichten
Service