Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 24. September 2019

24. September 2019

Plattdüütsch Narichten vun'n 24. September 2019 [3:36 Minuten]

Dat End vun den Bremer Klinikverbund?

Bremen: De Klinikverbund Geno schrifft woll noch mehr Millionen as rode Tallen. Dat weet de Werser Kurier ut en Plaan-Breef för den Geno-Opsichtsraat. Alleen tokamen Johr kunnen bi de städtschen Bremer Kliniken 15 Millionen Euro in de Kass fehlen. Bet 2023 kunnen dat sogor knapp 119 Millionen Euro ween. Wenn de Stadt nich mehr Geld an de Geno gifft, müss de bet 2021 Bankrott anmellen.

Stickt de Iran achter de Attacken op saudsche Öölanlagen?

Nee York: Düütschland, Frankriek un Grootbritannien hebbt seggt: De Iran is Schuld, dat Öölanlagen in Saudi-Arabien angrepen worrn sünd. „För uns is kloor, dat de Iran achter düsse Attacken stickt“ – so steiht dat in en Papeer vun de düütsche, franzöösche un britsche Regerung. Anners weer de Saak gor nich mööglich. De dree Länner övernehmt den Kurs vun de USA. De Iran seggt, dat is nich wohr. Se hebbt dor jümehr Finger nich mit in’t Speel hatt.

Fleger-Unnernehmen Condor un Ving wüllt wiedermaken

Berlin/Oslo: De düütsche Ferien-Fleger Condor un de Fleger-Gesellschap Ving ut Skandinavien wüllt wiedermaken. Beid sünd se Dochter-Unnernehmen vun den Reise-Bedriev Thomas Cook, de pleite is. Bi Ving verdeent se avers Geld, meen de Geschäftsföhrung. Dorum kunnen se mit den Bedriev wiedermaken, wenn se Stütt kriegt vun Banken, Geldgevers un Börgerslüüd.

UN-Klima-Top-Drepen: Över 60 Länner seggt mehr Hölp för dat Klima to

Nee York: Mehr as 60 Länner hebbt bi dat UN-Klima-Top-Drepen toseggt: Se wüllt mehr dorgegen in Gang setten, dat dat op de Eer warmer un warmer warrt. Grote Wirtschaps-Staaten as Düütschland, Frankriek un China hebbt verkloort, wat se sik vörnahmen hebbt – jüst as Tonga, de Seychellen un anner lütte Inselstaaten, bi de de Klimawannel afsünnerlich to marken is. De Aktivistin Greta Thunberg harr de Top-Lüüd vun de Staaten un Regerungen vörher anklaagt, se wörrn to wenig doon.

Wolfsborg hett wedder nich verloren

Wolfsborg: In de Football-Bunnsliga hett de VfL Wolfsborg noch jümmers keen Speel verloren. Gegen 1899 Hoffenheim hebbt se güstern 1:1 speelt. Un denn: Jürgen Klopp is wählt worrn as de beste Football-Trainer op de Welt. De FIFA hett den Mann, de mit den FC Liverpool de Champions League wunnen hett, güstern Avend uttekent. As Weltfootballer 2019 hebbt se Lionel Messi wählt.

Dat Weer

Un woans süht dat mit dat Weer umto ut? Opstunns hebbt wi in Bremen 13 Graad, in Bremerhaven sünd dat 14 un in Emm un Ossenbrügge 15 Graad. Vundaag: Wat noch an Regen vun de Nacht na weer, is vunmorgen gau över de Elv aftrocken. Nu hebbt wi mal Sünnschien, mal Wulken. Eerst laat an’n Namiddag un an’n Avend kaamt vun Westen her dichte Wulken ran, de ok en beten Regen mitbringt. Dat Thermometer krabbelt op 19 bet 21 Graad. De Wind dorto weiht flau oder en beten mehr vun de süden bet süüdwesten Kant, gegen Avend dreiht he op Süüdoost. Tokamen Nacht: Meist överall dichte Wulken, un vun’t Emsland her treckt Regen pö a pö na Noordoosten. Bi 14 bet 12 Graad. Morgen: Vele Wulken, af un an pladdert dat ok. Eerst gegen Avend lockert dat mal op. Nich mehr as 16 bet 18 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Carola Schwirblat.

Bremen Eins
Service