Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 24. Mai 2019

24. Mai 2019

Plattdüütsch Narichten vun'n 24. Mai 2019 [3:30 Minuten]

Europawahl geiht wieter

Brüssel: An’n tweten Dag vun de Europawahl sünd hüüt de Minschen in Irland un Tschechien opropen, an de Urnen to gahn. Güstern al hebbt de Briten un de Nedderlänner wählt. As dat opstünns utsüht, tekent sik in de Nedderlannen en Överraschen af. Denn dor liggen de Sozialdemokraten vör de konservativ-liberale Partei vun Regierungsbaas Rutte. De Rechtspopulisten verleern düütlich, as dat schient. In Düütschland maakt de Wahllokale an’n Sünndag op.     

Wahl-O-Mat wedder in’t Nett

Berlin: In’n Striet üm den so nöömten „Wahl-O-Mat“ sünd se sik ahn Gericht enig worrn. De Partei „Volt“ hett ehr Beschwerde trüchtrucken. Dorför hett de Bunnszentraal för politische Billung tosekert, dat dat Internetangebott ännert ward. In’n September to de Landdagswahlen in Brannenborg un Sassen kann en denn all Parteien mitnanner verglieken. In’n Momang kann de „Wahl-O-Mat“ blots bet to acht Parteien to glieker Tiet verglieken. Dat hett de Partei „Volt“ kritiseert, wiel se sik nich de glieken Schangsen utrekent harrn.       

Wessel an de SPD-Frakschoonsspitze?

Berlin: De fröhere SPD-Baas Schulz versöökt, as dat schient, Andrea Nahles as Frakschoonsböverste aftolösen. As dat Narichtenmagazin „De Spegel“ vermellt, hett dat al en Krisen-Drapen twüschen de beiden geven. Dat geiht dorüm, dat se bang vör en Daalslag bi de Europa- un de Bremen-Wahl sünd. Siet en poor Daag ward jümmer wedder munkelt, dat dat en Opstand gegen Nahles geven schall.    

Schöler-Grootdemo in Bremen un Bremerhaben plaant

Bremen: Mit en Grootdemonstratschon wüllt Schoolkinner in Bremen un Bremerhaben hüüt wedder för en Wannel in de Klima- un Ümweltpolitik op de Straten gahn. De Utrichter vun de so nöömten „Fridays For Future“-Akschoon reken mit mehrere dusend Demonstranten. Vun Klock 10 an trecken se denn vun’n Bahnhoff dör de Bremer Binnenstadt to’n Brill. In Bremerhaben fangt de Demonstratschon um halbig 12 an’t Stadthuus an. An’n Diek wüllt se denn en Minschenkeed billen.

Relegatschoon to de Football-Bunnsliga

Stuttgart: Football-Bunnsligist VfB Stuttgart mutt wieter bang ween, dat se ut de Liga flegen. De Schwaben sünd an’n Avend in’t Relegatschoons-Henspeel to Huus nich över en 2:2 gegen Tweetligist Union Berlin rutkamen. Dat Rückspeel gifft dat an’n tokamen Maandag.

Bi de Eishockey-Weltmeisterschaft is de düütsche Natschonalmannschaft ünner de letzten acht rutflagen. Dat Team hett 1:5 gegen Tschechien verloren un is so Sösster bi de WM worrn.               

Dat Weer

Un nu en Blick op dat Weer: op Wangerooge 17, in Bremerhaben un an‘n Bremer Flegerhaben 19, un in Ossenbrügge sünd dat opstünns 20 Grad.Hüüt blifft dat meisttiets fründlich mit veel Sünnschien. Blangenbi gifft dat lockere Wulkenfeller. Vun’n Namiddag an kann dat in’n Süden vun Bremen ok Schuer geven. De Temperaturen liggen twüschen 17 un 22 Grad. In de Nacht is dat eerst licht wulkig, later kann dat an de Noordsee ok mol drüppeln. Dat Thermometer fallt op 7 bet 11 Grad. Mörgen kriggt wi dichte Wulken, de to’n Deel Regen oder Spütterregen bringt. Vun’n Namiddag an sett sik denn af un an de Sünn dör, man dat langt blots för 14 bet 17 Grad.

Dat weern de Narichten op platt. Tohoopstellt hett se Ralph Stölting. Op Platt trechtmaakt un vörleest vun Marc Gelhart.

Bremen Eins
Service