Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 1. Dezember 2020

1. Dezember 2020

Plattdüütsch Narichten vun'n 1. Dezember 2020 [5:02 Minuten]

Dormit dat Corona-Virus nich mehr un mehr warrt, sünd vun hüüt af an de Vörschriften wat strenger

Bremen: Wo dat nu op ankummt, is dat verknappen vun Kuntakte. Nu dröfft sik man blots noch fief Minschen ut hööchstens twee Huusholte drapen. Kinner tellt dor nich to. Butendem warrt de Maskenplicht leger. Af vundaag mööt de Minschen ok op Parksteeden vun Geschäfte, in Bedrieve un Amtstuuven aver ok op Delen un in Fohrstöhl en Snuut-Nees-Mask dregen. Ok in Koophüüs gellen af nu nee Regeln: In Laadens de bet achthunnert Quadratmeters groot sünd, mutt jedeen Kunn tominns teihn Quadratmeters Platz hebben. In gröttere Ladens draff een wiederer Kunn op wiedere twintig Quadratmeters in den Laden rin.

Moderna stellt en Andrag in de EU un USA dat de Impfstoff tolaten warrt

Washington: Dat US-Pharmaünnernehmen Moderna hett, as se dat al künnigt maakt harrn, en Andrag stellt, dat jümehr Corona-Impfstoff in de EU un den USA tolaten warrt. Wat se dorvör bruukt hebbt se op den Disch leggt, see de Konzern. Moderna is dat eerste Ünnernehmen, dat in de EU en Andrag stellt hett, den Corona-Impfstoff to genehmigen. Wat de Impfstoff gegen dat Virus utrichten kann, sünd um un bi 94,1 Perzent wirken, see ene nee klinsche Studie. Dat de Krankheit böös verlöppt, kann de Impfstoff sogor mit eenhunnert Perzent afwehren, see Moderna. De Konzern will dor op daal, dat de Impfstoff noch in düt Johr genehmigt warrt.

Tahl vun Gesundheitsämter, vun de to veel verlangt warrt, stiegt wieder an

Berlin: Liekers de Tahlen vun nee Infektschoon mit dat Corona-Virus trööchgahn, steiht in en Bericht dat de Gesundheitbehöörden mehr un mehr in de Kniep sünd. Dat warrt jümmer leger dor achter ran to ween, mit wen de Corona-Kranken Kuntakt harrn. 60 vun 400 düütsche Gesundheitsämter hebbt dat Robert-Koch-Institut güstern mellt, dat warrt nu eng, dat mellt dat „Nee Ossenbrügger Blatt“, de Zeitung hett dat vun de RKI-Sprekersche to weten kregen. 43 Behöörden sünd in de Kniep wiel de Kapazität knapp warrt. 17 wiedere Gesundheitsbehöörden geevt an: Dat is aftosehen, dat jüm dat in korte Tiet ok so geiht.

Seehofer verbüdd rechtsextreme „Sturmbrigade 44“

Berlin: Bunnsbinnenminister Horst Seehofer vun de CDU hett de Verenigung „Stormbrigade 44“, de sik ok „Wolfsbrigade 44“ nöömt, verbaden. Dat see en Spreker vunmorgen. Jümehr Kennteken draff nu nich mehr wiest warrn. Un dorum geiht dat Bunnsbinnenminister Horst Seehofer: Ganz veel Saken sammeln de rechtsextremistische Strukturen opkloren könnt, Geld un Goot ut´n Verkehr trecken un Material för Reklaam seker stellen. Vörutgahn sünd Akschoon gegen 13 Liddmaten in dree Bunsländer: Hessen, Mecklenburg-Vorpommern un Nordreihn-Westfalen.  

Dat is amtlich: Biden hett in Arizona un Wisconsin wunnen

Washington: Na en poor annern Bunnsstaaten wo dat jümmer hen un her gung, hebbt nu ok Arizona un Wisconsin seggt: Dat is amtlich, de Demokraat Joe Biden hett de Wahl wunnen. Biden hett in Wisconsin bi de Präsidentenwahl an drütten November mit um un bi 20.000 Stimmen gegen sien Wedderpart Trump wunnen. In Arizona hett Biden mit knapp 10.500 Stimmen de Nees vörn. Präsident Trump hett siene verlorene Wahl jümmers noch nich togeven. De 538 Wahllüüd in´t ganze Land warrt an 14. Dezember över den tokamen Präsidenten afstimmen. Biden hett sik bi de Wahl 306 Wahllüdd sekert, dormit he winnt, bruukt he tominns 270 Wahllüüd.

Dat Weer

Un nu kiekt wi op dat Weer: Opstunns hebbt wi in Bremerhaben fief Graad, in Bremen sünd dat sess Graad, in Demorst söben Graad un in Emden hebbt wi acht Graad. Vundaag is dat wulkendüster un diesig. Vun Tiet to Tiet fallt Smuddelregen or Spütterregen. An Namiddag un Avend kann dat ok mol länger dröög ween. De Wind weiht flau, an de See in Maaten eerst vun de westen bet süüden Kant, denn dreiht he aver op de oosten bet nordoosten Kant. Dat Thermometer krabbelt dorbi op sess bet negen Graad. In de Nacht seht wi meist dichte Wulken, dor wo de Heven opritt, kann sik Daak billen. An de een or anneren Steed is ok Spütterregen mööglich. Dat Thermometer sackt op dree bet een Graad. Morgen meist wulkig un diesig. Verenkelt kriggt wi ok Spütterregen af. Un dat denn bi veer bet fief Graad.

Dat weren de Plattdüütschen Narichten. Tohoopstellt vun Marcus Behrens. Op Platt trechtmaakt un vörleest vun Martina Brünjes.

Bremen Eins
Service