Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 14. Dezember 2018

14. Dezember 2018

Plattdüütsch Narichten vun'n 14. Dezember 2018 [3:14 Minuten]

Straßburg: De, den se för den Terroristen hollt is doot

Straßburg: Twee Daag nah den Anslag in de franzöösche Stadt hett de Polizei de, den se för den Terroristen hollt, doot maakt. Dat deiht dat franzöösche Binnenministerium kund. Den 29-Jöhrigen hebbt se gistern Avend in´t Straßburger Viertel Neudorp op de Straat to faat kregen. Bi den Versöök em intosperren hett he anfungen op de Polizei to scheeten. De Polizei hett sik sülvst verteidigt un dorbi is he denn to Dode kamen.

EU kummt London en beten in de Mööt

Brüssel: De Europäische Union geiht en Stück op Grootbritannien to. Dordör schall de Verdrag to´n Rutgahn in´t Londonder Parlament de mehrsten Stimmen kriegen. Op dat Top-Drepen vun de 27-EU Länner, de in de EU blievt, hebbt se eene Afsichts- Erklärung besluten. Dorbinnen steiht, dat se de uthannelten Sünnerregeln för eene apen Grenz twüschen Irland un Nordirland mööglichst nich insett. Un in´t Notfall blots för eene bestimmte Tied.

Dree Froenslüüd bi Attacke mit Messer to Schaden kamen

Nürnberg: In Nürnberg sünd an´t Avend binnen wenige Stunnen dree Froenslüüd daalsteken wurrn. Dorbi sünd se böös to Schaden kamen. De Polizei glövt, dat sik dat bi alle Attacken üm een un den sülbigen Angrieper hannelt. Henwiese op eenen terroristischen Achtergrund gifft aver noch nich, seggt se.

Dode dör Tuberkulose in´t Nordwesten

Emstek: Bi eenen Slachthoff in Emstek in´t Landkreis Cloppenborg is, as dat schient, een Mitarbeider an Tuberkulose doot blieven. Noch Dree vun den Bedrief sünd doran krank wurrn. Dat hett de Landkeis hütt morgen melld. Dat Amt för Gesundheit hett stantepee anordnet, dat se alle Minschen , de rundüm de Kranken weern, ünnersökt. Dorbi hebbt se 55 wietere Minschen positv testet. Man dat een sik över dat Fleesch anstickt is nich mööglich, seggt dat Gesundheitsamt.

Leverkusen un Frankfurt wieter- Leipzig is rut

Leipzig: In de Football-Europaleague gaht twee Mannschaften ut de Bundesliga, as Winner in ehre Gruppen, in de K.O.-Runn. Leverkusen hett 5:1 gegen Larnaka in Zypern wunnen. Un Frankfurt harr gegen Lazio Rom mit 2:1 de Näs vörn. Man Leipzig is mit een 1:1 gegen Trondheim nich wieter kamen un is nu rut.

Dat Weer

Un nu een Blick op dat Weer: an den Bremer Flegerhaben , in Bremerhaben an de Fischereehabensslüüs un in Verden 1, un in Cuxhaben sünd dat opstunns 3 Graad. Hüüt hebbt wi veele Wulkenfeller, dar kiekt aver af un an mal de Sünn rut. To de Nordsee hen is de Sünn mehr to sehn, un dat blifft meist drööge, bi 0 bit 2 Graad. Tokamen Nacht wiest sik de Heven wulkig. Dat Thermometer sackt op minus 2 bit minus 3 Graad.Morrn is dat den ganzen Dag dick wulkig und gries. Later kummt denn ok mal de Sünn rut, keen Regen. Dat is deels frostig bi minus 1 bit plus 1 Graad. An Sünndag kummt vun Südwesten her erst Snee runner, later is denn ok Isregen mööglich, bi 0 bit 2 Graad. Dat weern de Nahrichten op platt. Michael Nendza hett se tohoopstellt. Op Platt trechtmaakt un vörleest hett se Antje Kruppa.

Plattdeutsche Nachrichten
Service