Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 11. Dezember 2019

11. Dezember 2019

Plattdüütsch Narichten vun'n 11. Dezember 2019 [3:36 Minuten]

Kontrollen för Eten un Drinken fallt ut

Berlin – In Düütschland fallt um un bi jede drütte Kontroll vun Eten un Drinken ut. Dat is rutkamen,as de Organisatschoon „Foodwatch“ sik dat nipp un nau ankeken hett, seggt de „bayrische Rundfunk“ un dat Blatt „Welt“. Wo dat an liggen deit? Se hebbt to wenig Personaal. Foodwatch seggt: Dat is en groten politischen Schandaal. Besünners fallt op, dat all Nees lang de Kontrollen in Bremen utfallt.

Bunnsregeren will Lüüd de bi Thomas-Cook bookt hebbt, Geld geven

Berlin – De Bunnsregeren will de Lüüd Geld geven, de bi Thomas Cook bookt hebbt. Dat schall de Bunnsdag vundaag besluten, seggt dat ARD-Hauptstadtstudio. Dat gifft nu al Geld vun ene Versekerung, aver düt Geld langt in Düütschland nich. De düütsche Thomas Cook hett in´n September seggt, dat se Pleite sünd. All Reisen hebbt se denn afseggt, ok wenn de al betahlt weren.

Kinnergoorn-Steden: CDU un FDP bekriddelt de Bremer Lannsregerung

Bremen – CDU un FDP bekriddelt de Lannsergerung, dat se in Kitas nich noog Kinner ünnerbringen köönt. Beid Parteien hebbt in de Börgerschaft de root-gröön-roten Lannsregerung vörsmeten: Se kümmert sik dor nich noog um. So as de Saaken nu steiht, is dat schofelig för ene Lannsregerung, seggt de FDP-Bildungspolitikersch Bergmann. In Bremen fehlt um un bi dusend Kinnergoorn-Steden.

Mehr Öllerntiet in Bremen

Bremen – Jümmer mehr Vadders nehmt sik de Öllerntiet in Bremen. Dat seggt de Tallen vun dat statistische Bunnsamt. Siet 2015 is de Andeel in Bremen um mehr as dree Perzent na baven gahn. Liekers liggt Bremen dormit jümmers noch düütlich achter den Bunnsdörsnitt. In Öllerntiet kriegt Vadders un Mudders Öllerngeld. Dat schall dat Inkamen utglieken, dat fehlt, wenn Öllern ehr Kind na de Geboort sülven betüdelt.

Gerichtsverhanneln in Verden

Verden – Vundaag staht twee Mannslüüd vör dat Landgericht. Se hebbt woll en Fro wat andaan un ok annere Saken gegen dat Gesett maakt. Mit ene Anzeig hebbt se ene Fro anlockt, se denn insparrt un ehr sexuelle Gewalt andaan. In dat Johr 2008 sünd de beiden al för en lange Tiet achter Trallen kamen. Domols hebbt se dree Froonslüüd in Garlstedt gefangen nahmen, sexuell misshannelt un tominns eene vun de Froens to´n Sex för Geld dwungen.

Dat Weer

Un nu kiekt wi op dat Weer: Opstunns sünd dat in Veern veer Graad, an´n Bremer Flegerhaben un in Bremerhaben hebbt wi fief Graad un in Harlesiel sünd dat sess Graad. Vundaag is dat Wulkendüüster un dat pladdert jümmer wedder. Gegen Avend wannert de Regen na Süüdoosten. Al an´n Namiddag is dat meist vörbi mit den Regen. Ok an de Nordsee hebbt de Wulken an´n Namiddag al Löcker. Dat Thermometer kladdert op sess bit acht Graad. De Wind weiht in´t Binnenland in Maten. An de Küst blaast he eerst mit kraft un böig vun de Süüd- bit Süüdwestkant. Later warrd de Wind weniger. Tokamen Nacht hangt dicke Wulken an´n Heven. Gegen Morgen fangt dat wedder an to pladdern. Morgen sünd de Wulken mal dor, mal weg, af un an smiet se ok Natts rünner. An´n Namiddag schufft sik denn ok mal de Sünn dör de Wulken. De Temperaturen liggt twuschen fief un sess Graad. Dat weren de plattdüütschen Narichten. Tohoopstellt vun Andreas Schneider. Op Platt trechtmaakt un vörleest vun Martina Brünjes.

Plattdeutsche Nachrichten
Service