Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 7. Juli 2020

7. Juli 2020

Werder blifft in de Bunnsliga – achteran Krawall

Bremen: Eerst hebbt de Footballfans in de Stadt fiert, denn sünd se op de Polizei losgahn. Buddeln un Füerwarksknaller hebbt se op de Schandarms smeten. Hunnerte harrn fiert, dat Werder in de Bunnsliga blifft. Na Middernacht hett sik dat Bild aver dreiht. Lüüd hebbt versöcht, dör en Polizeikeed dörtobreken. De Schandarms hebbt Peperspröh insett un enige Radaubröder eerstmal fastnahmen. Werder Bremer hett güstern Avend in dat Afstiegs-Speel bi den 1. FC Heidenheim 2:2 speelt. Na dat 0:0 in Bremen blifft Werder in de eerste Liga binnen.

Rassismus-Studie: BDK bekriddelt Seehofer

Berlin: De Bund vun de Düütschen Kriminalbeamten hett bekriddelt, dat Bunnsbinnenminister Seehofer mööglichen Rassismus bi de Polizei nich ünnersöken laten will. BDK-Baas Fiedler sä in de ARD-Tagesthemen: Wat de Minister to dat Woso seggt, dat is teemlich schaneerlich. He will de Sekerheitsbehörden Stütt geven, man jüst dat deit he nich. So lett dat, de Polizei harr wat to versteken. Man dat is nich wohr. Seehofer harr seggt, he will de Studie nich, denn Polizeikontrollen mit rassistischen Achtergrund sünd ja sounso al verbaden.

Kene neen Corona-Regeln in den Kreis Gütsl

Düsseldörp: Wo en Gericht fastleggt harr: De Corona-Oplagen för den Kreis Gütsl sünd nich rechtens, will de nordrhein-westfäälsche Lannsregerung dor kene neen Regeln utgeven. Gesundheitsminister Laumann sä: Dat langt, wenn se op de Karanteen bi den Slachtbedriev Tönnies in Rheda-Wiedenbrück achten doot. Frische Tallen wiest: Se hebbt dor en P vörsett, dat Corona sik dor noch mehr utbreden kunn.

Keen Motorrad-Fohren an’n Sünndag? Städte- un Gemeend-Bund dorgegen

Berlin: De Städte- un Gemeend-Bund will nich, dat Motorrööd sünndags nich fohren dröfft. De eerste Geschäftsföhrer Landsberg sä in de „Ne’e Ossenbrügger Zeitung“: Motorrad-Fohren verbeden – dat weer de verkehrte Kurs. De Bunnsraat harr vörslaan: Vunwegen den Larm schullen Motorrööd an Sünn- un Fierdaag nich fohren. An’t Wekenenn weren överall in Düütschland Bikers dorgegen op de Straat gahn.

EU-Binnenministers snackt över Retten ut Seenoot

Brüssel: De Binnenministers vun de EU snackt vundaag in en Video-Kunferenz doröver, dat Lüüd op de Flucht ut Seenoot rett warrt. Bunnsbinnenminister Seehofer hett dat Leit. Wo he op daal will: Mehr Staaten schüllt Flüchtlinge opnehmen, de över See kaamt. De Behörden rekent dormit, dat in’n Sommer wedder mehr Flüchtlinge över dat Middelmeer na Europa kaamt.

Dat Weer

Un woans süht dat mit dat Weer umto ut? Opstunns hebbt wi in Bremerhaven, Nordholt un Syke 15 Graad, in Bremen sünd dat 16 Graad. Vundaag: Mal Sünnschien, mal dichtere Wulken. Af un an kann dat ok pladdern, vör allen an’n Namiddag. Mag ween, dat gifft ok Blitz un Dunnerslag. Dat Thermometer krabbelt blots op köhlige 16 bet 18 Graad. De Wind dorto weiht in Maten bet frisch vun de süüdwesten bet westen Kant, dorto däägte bet störmsche Böen, vör allen an de Noordsee. Tokamen Nacht: Mal mehr, mal weniger Wulken, regen kann dat ok. Bi 12 bet 10 Graad. Morgen: Wulken över Wulken, in’t Binnenland regent dat ok mal. Blots an de Küst kriegt wi de Sünn to sehn. Dat Ganze bi 16 bet 18 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Ulrike Müller.

Plattdeutsche Nachrichten
Service