Livestream

Bremen Eins Serien Plattdeutsche Nachrichten

Jetzt neu: butenunbinnen.de, alles wichtige aus der Region

Ukraine Außenministertreffen Boeing 777 Rückruf-Aktion Toyota Deutschkurse Migranten Bremen Inklusion Wetter Weer

De Plattdüütschen Nahrichten vun'n 9. April 2014

9. April 2014

Plattdüütsch Nahrichten vun'n 09. April 2014 [3:34 Minuten]

Westen plaant: Butenministers schöölt sik wegen de Ukraine tohoopsetten

Brüssel. De Westen stüert bi den Arger üm de Ukraine ok wieder en diplomaatschen Kurs. De EU-Kommischoon plaant: De Butenministers schöölt sik tokamen Week tohoopsetten. Mit an den Disch sitt denn de Europääsch Union, de USA, Russland un de Ukraine. Liekers: De USA kann sik nu ok vörstellen, dat ukrainsche Militär mit Wapen uttorüsten, dat dat Land en Attack afwehren kunn. Wieldes is de Laag in de Oost-Ukraine wieder nich in’n Griff. Opsichtslüüd ut den Westen meent: So keddelig as nu in de Ukraine is dat in Europa siet den Tweten Weltkrieg nienich ween.

Nee’e Signalen vun Boeing, de vemisst warrt

Perth. Sööktrupps sünd in den Indischen Ozean wedder Signalen wies worrn, de vun de Boeing 777 kamen kunnen, de se jümmers noch nich funnen hebbt. Dat sä de Mann, de dat Leit hett vun de Sööktrupps. Nu hebbt se al veer Maal Signalen infungen, un se meent: Bilütten kaamt se den Fleger op de Hacken. Kunn ween un in en poor Daag finnt se al Wrackdelen.

Toyota: Autos warrt na de Warksteed trüchhaalt

Tokio. De japaansche Autohersteller Toyota haalt Millionen vun Autos trüch in de Warksteed. Dat gellt för meist 7 Millionen Autos op de ganze Welt – mehr as 92.000 dorvun in Düütschland. Bi dat Modell Yaris kunn dat Maleschen mit de Sitzschien oder de Lenksüül geven. Bi de Modellen RAV4 un Hilux kunnen Kabel breken, vermell dat Ünnernehmen.

In Tokunft kene Düütschkursen mehr för Lüüd, de na Düütschland kaamt

Bremen. In Bremen gifft dat eerstmal kene nee’en Düütschkursen mehr för Lüüd, de na Düütschland kaamt. Dorachter stickt: Dat Geld ut en EU-Putt is all. Betnu is dat Programm för Butenlänners un Flüchtlinge vun den Europääschen Sozialfonds ESF betahlt worrn. In de Kursen kunnen de Migranten nich blots Düütsch lehren, nee, se sünd ok för’t  Arbeitsleven fit maakt worrn. Dat Bunnsamt för Migratschoon deelt eerst vun 2015 op an wedder Geld för dat Programm ut.

Inklusion in Bremen löppt goot

Bremen. Bi de Inklusion, dat heet: Kinner mit un ahn Behinnerung hebbt tosamen Ünnerricht, hett Bremen de Nees vörn. Bi en nee’e Ünnersöken vun de Bertelsmann-Stiftung is rutfunnen worrn: In’t Land hett sik bannig veel daan. Meist twee Drüddel vun de Schölers, de dat nich so licht hebbt bi’t Lehren, gaht op ganz normale Scholen, un nich op Sonderscholen. In Neddersassen süht dat ganz anners ut: Nich mal 15 Perzent vun de Schölers mit Problemen bi’t Lehren sünd op normale Scholen. Dormit liggt Neddersassen ünner den Bunnssnitt.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven un Emm 8 Graad. Op Langeoog sünd dat 10 Graad. Vundaag vele Wulken an den Heven, mitünner kann dat ok schuern. Dat Thermometer schafft dat blots op 13 Graad. De Wind dorto weiht mit Maten vun de westen bet noordwesten Kant. Af un an blaast he ok düchtig mit Böen vun 6 bet 8. Tokamen Nacht treckt de Wulken blots hier un dor af. Denn un wenn kann dat ok wat Natts vun baven geven. Dat köhlt af op 8 Graad. Ok morgen hebbt de Wulken wedder de Bavenhand. De Sünn schuelt blots mal för en lierlütten Momang rut. Bi 11 bet 13 Graad kann dat jümmers wedder regen oder schuern. Freedag süht dat nich veel anners ut. Un dat warrt noch en beten wat köhliger. An’t Wekenenn: vun allens wat dorbi: Wulken, Regen, Sünn. Bi 13 bet 14 Graad. Dat weern de Narichten. Op Platt trechtmaakt un vörleest vun Christiane Ehlers. Tohoopstellt hett jüm Katrin Martens.

Plattdeutsche Nachrichten
Service