Livestream

Bremen Eins Serien Plattdeutsche Nachrichten

Jetzt neu: butenunbinnen.de, alles wichtige aus der Region

Plattdeutsche Nachrichten

De Plattdüütschen Narichten vun'n 22. Januar 2018

22. Januar 2018

Plattdüütsch Narichten vun'n 22. Januar 2018 [2:50 Minuten]

Taaget Verhanneln steiht beför

Berlin: Dat Verhanneln twüschen SPD un Union schient nich so eenfach to weern. De CDU un CSU willt nich, dat se dat, wat bi dat Verhanneln mit de SPD rutsueert is, dat se dat noch mal wedder ännert.  De SPD Parteidag harr blots mit knappe Mehrheet för dat Verhanneln to eene Koalition stimmt. Se heppt sick vörnohmen, noch bannig veele Saaken nochmal to besnacken.

Bremsche Politikers freut sick över dat Verhanneln vun de Koalition

Bremen: De Politikers vun SPD un CDU seggt dat to, dat se nu in´n Bund över eene Koalition verhannelt. Man de sozialdemokratsche Börgermester Sieling will mehr, as dat wat bit nu afmaakt weer: keene Arbeitsverdräge för eene kotte Tied för junge Lüd un een Enn för de Twee- Klassen- Medizin. CDU Lannsbaas Kastendiek hollt dorgegen an. He seggt, dat man dat, wat all verhannelt is, nich so eenfach umstötten kann.

UN Sekerheitsraat will över de türksche Offensive in Syrien snacken

New York: De UN- Sekerheetsraat will Raat hollen doröver, dat  de Türkei mit Militär tegen de kurdschen Trupps in Syrien tegenan geiht. Türkische  Suldaten weern an´t Wekenenn in Nordsyrien inmascheert. Se willt de kurdischen Suldaaten dor verdrieven. De Türken seggt, dat se terroristische Afsichten hebbt. Man de kurdschen Trupps staht sick good mit de USA.

Vietnamese is in sien Heimatland verurdeelt wurrn

Hanoi: De Geschäftsmann Trinh Xuan Thanh, de, as se meent, ut  Dütschland versleppt worrn is, is nu in Vietnam för een Leeven lang achter Trallen verurdeelt wurrn. Se smiet em vör, dat he sick smeern loten hett. De Richter blifft mit sien Urdeel unner de Höchsttraaf. He harr em ok to´n Dode verurdeelen kunnt. Düsse Saak maakt de Laag twischen Dütschland un Vietnam stur.

Kerber unner de lesden acht

Melbourne: Angelique Kerber is in Australien unner de lesden acht komen. Dat weer stuur, man se hett sick mit 4:6, 7:5 un 6:2 tegen ehre Tegenspeelersche ut Taiwan dörsett. So is ehr ok nah de 13ten Speele in dütt Johr nüms över. Övermorrn will Kerber unner de letzen Veer komen.

Dat Weer

Un so steiht dat Thermometer upstunns: an´n Bremschen Fleegerhaben, an de Fischereehabenslüüs in Bremerhaben un up Wangerooge bi 1 Grod un in Deefhold bi 2 Grod. Hüüt Vomdag gifft dat Schneeschuers, un dat kann noch glatt ween. Bit to´n Middag goht de Schneeschuers vun Westen her in Regenschuers över.  An Nomdag blifft dat meist drög, dor kummt höchstens son beten Sprütterregen vun boben dal bi 4 bit 7 Grod. Tokamen Nacht gifft dat blots af un an son poor Schuers bi 5 bit 3 Grod. Vun Middeweeken an ward de Temperaturen smöder – bit to 14 Grod. De Wind weiht mit Maaten, an de Küst kann dat ok Stormböen geven. An Dunnerdag un Freedag gifft dat af un an Schuers bi 10 bit 7 Grod. Dat weern de Nahrichten. Carola Schwirblat hett se tohoop stellt. Op platt trechtmaakt un vörleest hett se Antje Kruppa.

Bremen Eins
Service