Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 29. Mai 2017

29. Mai 2017

Plattdüütsch Narichten vun'n 29. Mai 2017 [3:33 Minuten]

Schulz foddert mehr Europa as Antwurt op Trump

Berlin – Nah Kanzlerin Merkel hett ok SPD-Kanzlerkandidat Schulz de Europäer opropen, enger tohoop to arbeiden. Op alle Flachs mööt se mehr tohoopstahn, üm een Antwurt op Trump to finnen, sä Schulz. He bekrittelte vör allens dat Foddern vun de USA, mehr Geld för dat Verdeffenderen utogeven. Jüst sowat harr ok Merkel seggt. Se sä, de Tieden, in de man sik op annere verlaten kann, de sünd to’n Deel vörbi.

Nordkorea probeert wedder een Rakeet ut

Pjöngjang – Obschoons dat ut alle Welt orrig Kritik geven hett, hett Nordkorea in de Nacht wedder een Rakeet affüert. As de US-Marine vermellt, hannelt sik dat üm een Rakeet för korte Streken. Se is nah söß Minuten in’t Meer daalgahn. Dat weer all de drütte Raketentest vun Nordkorea in düssen Maand. De Regeern vun Südkorea hett een Drepen vun’t Sekerheitskabinett inropen. Japan hett protesteert un een scharpe Antwurt ankünnigt. Ut Washington heet dat, US-Präsident Trump wees informeert.

Frankrieks Präsident Macron dreept Kremlbaas Putin

Paris – Frankrieks nee’er Staatsbaas Macron hett an’n Nahmiddag den russischen Präsidenten Putin in Versailles to Gast. Beid wüllt vör allens över den Krieg in Syrien un den Striet in de Ukraine snacken. Bi dat G7-Drepen in Sizilien harr Macron ankünnigt, mit Moskau to snacken, üm een Enn vun’n Krieg in Syrien nöger to kamen. Russland ünnerstützt den syrischen Präsidenten Assad, wieldat de westlichen Länner op de Siet vun de Oppositschon staht.

Schmidt will weniger Salt, Zucker un Fett in Etensaken

Düsseldorp – Bunnesernährungsminister Schmidt will dat henkregen, dat in Etensaken bold weniger Salt, Zucker un Fett binnen sünd. Dat vermellt de Rheinische Post un weet dat vun een Kurspapeer vun’n Minister. Darnah schüllt de Hersteller freewillig de Rezepte ännern. Darbi geiht dat to’n Bispill üm Etensaken, de in de Industrie fardigstellt ward as Brot, Joghurt, Fröstücksflocken un deepfroren Pizza.

Bremerhabener Seestadtfest leep goot

Bremerhaben – Rund 280-dusend Minschen hebbt in de verleden Daag dat Seestadtfest besöökt. Dat sünd 20-dusend mehr as vör een Jahr, vermellt de Tourismus-Sellschupp. De Sellschupp plaant ok för dat tokamen Jahr een Seestadtfest. Siet den verleden Jahr is dat an de Stäe vun de Festweek Bremerhaben treden.

Dat Weer

Un nu een Blick op dat Weer: in Cuxhaben 15, an den Bremer Fleegerhaben un an de Fischereehabenslüüs in Bremerhaben 17 un in Ossenbrügg sünd dat opstunns 20 Graad. Hüüt fangt de Dag faken gries an, man dat ward gau fründlicher mit veel Sünnschien un Quellwulken. Later an’n Nahmiddag un Abend köönt verenkelt Grummelschuers daalgahn, to de Nordsee hen blifft dat meist dröög – bi 22 bit 31 Graad in’t Binnenland un üm de 18 Graad op de Eilanden. Tokamen Nacht treckt de Schuers af un dat ward licht wulkig or klaar. To’n Morrn hen kummt denn vun’t südliche Emsland her wedder nee’er Regen op. Dat Thermometer sackt op 18 bit 14 Graad. Morrn wesselt sik Sünn, dicke Wulken un Grummelschuers af. To’n Abend hen ward dat vun de Ems un Nordsee her wedder dröög, bi 18 Graad op de Eilanden un bit 25 Graad in Veern. Dat weern de Nahrichten op platt. Anja Guse hett se tohoopstellt. Op Platt trechtmaakt un vörleest hett se Heidi Jürgens.

Bremen Eins