Livestream

Bremen Eins Serien Plattdeutsche Nachrichten

Plattdeutsche Nachrichten

De Plattdüütschen Narichten vun'n 27. März 2017

27. März 2017

Plattdüütsch Narichten vun'n 27. März 2017 [3:24 Minuten]

CDU freit sik nah Wahlsieg in’t Saarland

Berlin – De Union sütt sik nah ehrn Erfolg bi de Landdagswahl in’t Saarland mit een grötter Stütt. CDU-Generalsekretär Tauber sä, de Wähler hebbt „Nee“ to Rot-Rot-Grön seggt. SPD-Baas Schulz vermellt, dat weer keen moier Abend för sien Partei. De Saar-CDU ward woll ok in Tokunft de Regeern anföhren – de Partei vun Ministerpräsidentin Kramp-Karrenbauer keem op bold 41 Perzent vun de Stimmen. De SPD liggt bi knapp 30, de Linken bi bold 13 un de AfD bi rund 6 Perzent. Gröne un FDP treckt nich in den Landdag.

Türken in Dütschland stimmt över Verfatenreform af

Hannober – In Dütschland köönt Türken vun hüüt an över de Verfatenreform in ehr Heimatland afstimmen. Rund 1,4 Millionen Minschen dröfft wählen. För Türken ut Bremen, Neddersassen un Sassen-Anhalt sünd för de Wahl twee Mess-Hallen in Hannober reserveert. In de Türkei geiht dat Afstimmen erst an’n Ostersünndag los. Präsident Erdogan will mit dat Ännern vun de Verfaten mehr Macht kriegen.

Hunnertdusende Kinner in’n Jemen vun‘n Dood dör Hunger bedraut

Berlin – Twee Johre, nahden de Krieg losgüng, geiht dat in’n Jemen för jümmer mehr Kinner üm Leven un Dood. Dat vermellt dat Kinnerhölpswark Unicef. Bold een halve Million Kinner hebbt nich noog to eten. Unicef röppt de internatschonale Gemeenschupp op, een Hungersnoot to verhinnern. Dat Kinnerhölpswark kriteseert, dat de Lüüd dat meist nich mitkriegt, wat nah den Börgerkrieg in dat arabische Land nahkummt.

Perzess üm Mess-Stekeree in’n Rhododendron-Park fangt an

Bremen – Vör dat Landgericht hett an’n Vörmiddag de Perzess üm een Mess-Stekeree in’n Bremer Rhododendronpark anfungen. De Anklaagte schall dar in’n verleden Oktober een paar Minschen op’n Stutz angrepen hebben - acht vun jem sünd versehrt worrn. De 29-jöhrige is wegen versökten Moord anklaagt. Wieldat he as psychisch krank gellt, mööt se in’n Perzess rutfinnen, of he schuldfähig weer, as dat Verbreken passeert is.

Nee’et Krüüzfahrtschipp nimmt Kurs op de Nordsee

Papenborg – Dat nee’e Krüüzfahrtschipp vun de Meyer-Warft is op’n Weg to de Nordsee. De mehr as 320 Meter lange „Norwegian Joy“ keem an’n laten Abend ut de Dockslüüs in Papenborg. Hüüt Abend ward dat Schipp in’t nedderlännische Eemshaven sien. Veele Tokiekers un Neeschierige verfolgt de Fahrt op de Ems.

Dat Weer

Un nu een Blick op dat Weer: in Cuxhaben 5, an den Bremer Flegerhaben 8, an de Fischreehabenslüüs in Bremerhaben 9 un in Ossenbrügg sünd dat opstunns 10 Graad. Letzte Wulkenfelder lööst sik hüüt op un de Sünn schient faken. Dat blifft överall dröög bi 10 Graad op de Eilanden, 14 Graad in Bremerhaben un bit to 18 Graad in Vechte. Tokamen Nacht ward dat licht wulkig or klaar, dat kann Nevel geven. Dat Thermometer sackt op 4 bit null Graad. Morrn schient faken de Sünn, later treckt vun Westen her een paar blots dünne Wulken op bi 12 bit 20 Graad. Middeweken dicke Wulken, meist keen Sünn mehr un af un an Regen bi 10 bit 15 Graad. Dat weern de Nahrichten op platt. Anja Guse hett se tohoopstellt. Op Platt trechtmaakt un vörleest hett se Heidi Jürgens.

Bremen Eins