Livestream

Bremen Eins Serien Plattdeutsche Nachrichten

Jetzt neu: butenunbinnen.de, alles wichtige aus der Region

Plattdeutsche Nachrichten

De Plattdüütschen Narichten vun'n 24. April 2018

24. April 2018

Plattdüütsch Narichten vun'n 24. April 2018 [3:02 Minuten]

Teihn Dode: Kassenwagen fohrt in Footgängers rin

Toronto: In’t kanaadsche Tonronto hett en Mann mit en Kassenwagen tominnst teihn Footgängers doot fohrt. De Polizei seggt: 15 mehr sünd verletzt worrn, bi enige geiht dat noch um Leven un Dood. De Mann hett den Wagen woll mit Willen op den Footweg stüert. Eerst weer de Student vun 25 Johr utknepen, man bald harrn se em faat kregen. Woso he dat maakt hett, dat weet se noch nich.

Frankrieks Präsident op Staatsvisit in de USA

Washington: Präsident Macron vun Frankriek is na de USA fohrt. US-Präsident Trump hett em mit militäärsche Ehren wellkamen heten. Macron is de eerste Staatsgast, den Trump as Präsident amtlich begrött hett. Snacken wüllt se över de Laag in Syrien un den Hannelsstriet twüschen de USA un Europa. Macron will ok in dat Kapitol en Reed hollen.

Geldgever-Kunferenz to Syrien geiht in Brüssel los

Brüssel: Op en Kunferenz wüllt se Geld för Syrien insammeln. Hüüt un morgen sitt in Brüssel Diplomaten vun 85 Staaten an’n Disch. Se bruukt Geld för de armen Minschen dor un för de, de op de Flucht sünd. Söven Johr duert de Börgerkrieg dor nu al, 13 Millionen Minschen in Syrien un in de Naver-Länner köönt nich för sik sülvst sorgen. Hölpsorganisatschonen meent: De Staaten vun de Welt schüllt geern deep in jümehr Knipptasch griepen.

Bösen LKW-Unfall op de A 1

Willshusen: Bi en Unfall op de A 1 is en Lastwagen-Fohrer böös verletzt worrn. Güstern Avend weer de Mann mit sien Wagen twüschen Groot Ippener un Willshusen vun de Autobahn afkamen un en Damm dalstört. Woso dat dorto kamen is, weet se noch nich. De Polizei seggt: Anner Autos hebbt dor keen Rull bi speelt. Na Ossenbrügge to müssen se de Autobahn en poor Stünnen lang afsparren.

Wedder Füer in Bremerhaven

Bremerhaven: In dat Quarteer Eckernfeld hebbt güstern Namiddag twee Goornhüüs brennt. Minschen sünd nich to Schaden kamen. De Polizei will nu weten, woans dat dorto kamen is un wat dat een mit dat anner tosamenhangt. Wo hooch de Schaden is, dat weet se noch nich.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Deefholt un Zeven överall 10 Graad. Vundaag: De Wulken blievt dicht an dicht, un eerst kann dat ok en beten pladdern. De Namiddag un de Avend bringt denn mehr Regen. Dat Thermometer schafft dat nich över 12 bet 15 Graad rut. De Wind dorto weiht in Maten bet frisch vun de süüdwesten bet westen Kant, ok mi deegte un störmsche Böen. Tokamen Nacht: Dichte Wulken, dat regent wieder, ok mal kräftig. Bi 11 bet 8 Graad. Morgen: Eerst schuert dat noch, man de Regen treckt gau af. Denn kriegt wi vun allens wat. Dat Ganze bi 12 bet 14 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katrin Martens.

Bremen Eins
Service