Livestream

Bremen Eins Serien Plattdeutsche Nachrichten

Jetzt neu: butenunbinnen.de, alles wichtige aus der Region

Plattdeutsche Nachrichten

De Plattdüütschen Narichten vun'n 21. November 2017

21. November 2017

Plattdüütsch Narichten vun'n 21. November 2017 [3:11 Minuten]

Steinmeier snackt mit Top-Lüüd vun Gröne un FDP

Berlin: Wo bi de Runnen vörweg för en Jamaika-Koalitschoon nix bi rutkamen is, kummt Bunnspräsident Steinmeier vundaag mit de Top-Lüüd vun de Grönen un de FDP tohoop. An’n Middag snackt he mit FDP-Baas Lindner, vörher harrn ok de Grönen seggt: De Präsident harr jüm inlaadt. Morgen sett sik Steinmeier mit SPD-Baas Schulz an een Disch.

Keen Jamaika: De Düüütschen finnt dat schaad

Berlin: De meisten Düütschen finnt dat schaad, dat Union, FDP un Gröne nich op een Brett kamen sünd. De ARD-Düütschlandtrend hett rutfunnen: 57 Perzent beduert, dat de Jamaika-Koalitschoon nich kummt. 31 Perzent seggt: Dat is beter so.

Ok CDU seggt Ja to grote Koalitschoon in Neddersassen

Hannover: In Neddersassen hebbt SPD un CDU den Kurs op grote Koalitschoon stellt. Eerst harr de SPD den Verdrag för de Koalitschoon annahmen, nu hett ok de CDU dor Ja to seggt. Op en lütten Parteidag in Hannover weern all dorför. In dat Poppier steiht binnen, dat se Schoolmesters un Schandarms instellt, dat dat Kita-Geld wegfallt un dat dat een Karken-Fierdag mehr geven schall.

Feernsehpries för düütsche Serie

Berlin: De düütsche Feernseh-Serie „Familie Braun“ hett den groten Feernsehpries „International Emmy“ wunnen. De Serie dreiht sik um en Wahn-Grupp vun Neonazis, de sik op mal um en swatte Deern vun söss Johr kümmern mutt. De „International Emmy“ is en Aflegger vun den wichtigsten Feernsehpries op de Welt.

Werder mit Plus

Bremen: Werder Bremen schrifft wedder swatte Tallen. Geschäftsföhrer Filbry sä: Umsett hebbt se in’t aflopen Geschäftsjohr 123 Millionen Euro, een Johr vörher weern dat noch goot 108 Millionen ween. Geld inbröcht hebbt de Transfers vun Vestergaard, Ujah un Gnabry. So hebbt se ünner’n Streek vun all Speeltieden, in de se nich internatschonal ünnerwegens ween sünd, de besten Tallen stahn.

Dat Weer

Un woans süht dat mit dat Weer umto ut? Opstunns hebbt wi in Bremen un Bremerhaven 6 Graad, in Emm sünd dat 10 un in Vechte 11 Graad. Vundaag: vele Wulken, ut de dat af un an ok mal en beten pieselt. An’n Namiddag treckt vun Süüdwesten mehr un mehr Regen ran. Dat Thermometer blifft teemlich wiet ünnen bi 6 bet 9 Graad. De Wind dorto weiht flau, laterhen ok en beten mehr, vun de süüdoosten Kant. Tokamen Nacht: Jümmers noch Wulken över Wulken, un dat regent stüttig wieder. Dat Ganze bi 8 bet 6 Graad. Morgen: Vele Wulken, un eerst pladdert dat ok noch af un an. Denn aver dröögt dat bet to’n Namiddag doch pö a pö af. Un denn pliert achter de Wulken ok mal de Sünn rut. Mit 12 bet 13 Graad wedder wat warmer. Dat weern de Narichten. Op Platt trechtmaakt un vörleest vun Reinhard Goltz. Tohoopstellt hett jüm Jan Siegert. Un noch wat: Düsse Narichten köönt Se vun nu op an op Se Ehr Handy nahören in de nee’e ARD-Audiothek. Kösten deit dat gor nix.

Plattdeutsche Nachrichten