Livestream

Bremen Eins Serien Plattdeutsche Nachrichten

Jetzt neu: butenunbinnen.de, alles wichtige aus der Region

Plattdeutsche Nachrichten

De Plattdüütschen Narichten vun'n 20. April 2018

20. April 2018

Plattdüütsch Narichten vun'n 20. April2018 [3:00 Minuten]

Organisatschon Amerikanischer Staaten bekrittelt Kuba

Washington: Kuba het een nee'en Staatsbass, man de Organisatschon Amerikanische Staaten is de Meenen, wat dat dor nich rechtens lopen is. De Organisatschon seggt, wat de Familie Castro blots seker gahn will, wat dat Regime in Kuba so blieven kann. Sowat het uk Diktator, so een Spreker. Dat Parlament in Hanvanna harr güstern fastleggt, wat Vizepräsident Diaz-Canel nu de nee’e Staatsbass is. He löst Raul Castro af.

Scholz will sick in de USA för Hannelskompromiss insetten

Washington: Bunnsfinanzminister Scholz sett sick in't Witte Huus graad för een Enn vun den Hannelsstriet mit de USA een. He het all mit US-Vizepräsident Pence doröver snackt un is sick seker, wat uk de USA kien Striet mit de EU will. De US-Regeren het de Straftöll op Stahl un Aluminium för de EU blots bet to´n eersten Mai utsett. Wo dat dorna wieter geiht, steiht noch nich fast.  

Hauptbahnhof in Berlin mott evakuiert warrn wegen grooten Blindgänger

Berlin: Siet Klock Negen mööt de Minschen midden in de Stadt ehre Hüser un Büros verlaten. Dat gellt ok für Ministerien, Botschaften un Krankenhüser. Sogar de Hauptbahnhof maakt för een poor Stunnen dicht. Dat liggt an een Weltkriegsbombe, de se bi Booarbeiten funnen hebbt. Fachlüüd mööt nu eerst den Zünder bi de fiefunnert Kilo Bombe rutdreihen. Dat schull in eene Stunn losgahn.

Risiko-Footballspeele in Noorden hebbt Millionen Euro kost

Ossenbrüüg: De noorddeutschen Bunslänner hebbt siet Sommer 2015 tosammen eene tweestellige Millionensumm för de Polizei bi Footballspelen utgeven. Dat het dat Nee’e Ossenbrügger Blatt utrekt. Alleen Bremen kommt op 4,6 Millionen, Hamborg op 6 Millionen un in Neddersassen sünt dat sowat 16 Millionen Euro, wat de Schandarms kost hebbt. Dat Blatt het de Informationen vun de Behörden.

Bremen will mehr Lüüd för de Olenplege halen

Bremen: Dat Bunsland will mehr Lüüd in de Olenplege halen un denkt dorbi uk an Minschen, de all lang kiene Arbeit mehr hebbt of an Flüchtlinge. De Sozial-Deputatschon will nu versoiken, düsse Lüüd för den Beruf to qualifizieren. Bremen will dorför 700.000 Euro utgeven un dörtig Lehrsteeden betahlen. De Opositschon bekrittelt den Plan un seggt, dat is allens nich noog för de Probleme in de Plege.

Dat Weer

Vundaag lacht de Sünn wedder de meeste Tied – blots twüschendör wiest sick mol een poor Wulken. Man de maakt nix. Dat Thermometer krabbelt wedder op bet to 28 Graad, an de See op 20 Graad. De Wind weiht flau vun de noordwesten Kant. Tokamen Nacht meist överall steernkloor un dat köhlt af op sowat söß Graad. An´t Wekenenn wedder masse Sünnschien, man nich mehr heel so warm bi sowat 20 Graad. Sünndaag treckt avends eerste Gewidderschuur dör.

Plattdeutsche Nachrichten
Service