Livestream

Bremen Eins Serien Plattdeutsche Nachrichten

Jetzt neu: butenunbinnen.de, alles wichtige aus der Region

Plattdeutsche Nachrichten

De Plattdüütschen Narichten vun'n 20. November 2017

20. November 2017

Plattdüütsch Narichten vun'n 20. November 2017 [3:20 Minuten]

FDP will nich mehr wieter över Jamaika snacken

Berlin – Dat Snacken över een erste Jamaica-Koalitschon in’t Bund is nu vörbi. De FPD hett dat Verhanneln kort vör Middernacht afbroken. As FDP-Baas Lindner vermellt hett, hebbt se dat bi dat Snacken mit CDU, CSU un den Grönen nich henkregen, een gemeensam Weg to finnen, wo all sik vertroon köönt.

Merkel deiht dat leed, dat se nich wieter verhannelt

Berlin – Bunneskanzlerin Merkel sä, dat ehr dat leed doot, dat de FDP dat Snacken un Verhanneln afbroken hett. Merkel hett versproken, as Bunneskanzlerin, de se nu is, allens to daan, dat dat Land fast un seker darsteiht. Se will noch an’n Vörmiddag mit den Vörstand vun ehr Partei daröver beraden, woans dat nu wietergeiht un ok mit Bunnespräsident Steinmeier över de nöchsten Schreed snacken.

Perzess üm Metzensteekeree in de Waterfront fangt an

Bremen – Vör dat Landgericht hett de Perzess üm een Metzensteekeree in de Waterfront anfungen. Dree Mannslüüd mööt sik verantwurten wegen versöökten Dodslag un gefährlich Versehren vun annern Minschen. De Anklaagten schüllt tohoop een 29-jöhrigen swar versehrt hebben. De Block mit Ladengeschäften weer wegen dat Angriepen vör goot een half Johr leer rüümt un to’n Deel afsperrt worrn.

Sektenföhrer Charles Manson is dod

Los Angeles – De ehemalig Sektenföhrer Charles Manson is dod. Dat hebbt de Ämters in’n US-Bunnesstaat Kalifornien vermellt, wo Manson bit toletzt achter de Trallen seten hett. He is eenfach inslapen, heet dat. Manson is 83 Johr old worrn. Sien Sekte harr an’n Enn vun de 1960er Johren söben Minschen ümbröcht. För dat Opstacheln darto weer Manson eegens to Dode verurdeelt worrn, man nahden de Dodesstraaf in Kalifornien afschafft worrn is, seet he för den Rest vun sien Leven in’t Kaschott.

Werder Bremen hett to’n ersten Mal in düsse Saison wunnen

Bremen – Mit een 4 to 0 gegen Hannober 96 hett Werder Bremen in de Football-Bunnesliga to’n ersten Mal in düsse Saison wunnen. De Toore in’t erste Spill tohuus ünner den nee’en Trainer Florian Kohfeldt hebbt Bartels un Kruse schaten, de den Ball glieks dreemal in’t Nett haut hett. Werder liggt nu op den 16. Platz vun de Tabelle.

Dat Weer

Un nu een Blick op dat Weer: in Ossenbrügg 4, in Ollenborg 5, an’n Bremer Fleegerhaben un an de Fischereehabenslüüs in Bremerhaben sünd dat opstunns 6 Graad. Hüüt is de Heben meist gries un dat regent faken, an’n Nahmiddag ok duller un för een länger Tied bi 6 bit 8 Graad. Tokamen Nacht blifft dat dick wulkig un dat kummt wieter natt vun baben. An de Nordsee kann dat an’n Morrn ok mal dröög warrn. Dat Thermometer sackt meist nich op 6 bit 3 Graad. Morrn ward dat blots af un an mal een beten heller, anners blifft dat dick wulkig, gries un dat regent jümmer wedder mal licht. An’n Abend kummt vun Westen her wedder mehr Regen op bi 6 bit 9 Graad. Middeweken erst Regen, an’n Nahmiddag dröög un een beten Sünn bi milden 11 bit 13 Graad. Dat weern de Nahrichten op platt. Jan Siegert hett se tohoopstellt. Op Platt trechtmaakt un vörleest hett se Heidi Jürgens. Un noch wat: düsse Nahrichten köönt se vunnu an ok op ehrn Plietschfon nahören in de niege ARD-Audiothek. Darför mööt se ok nix betahlen.

Bremen Eins
Service